Sápmi |

Guldal jiena: Skuvlagalledeaddjit muitališgohtet sámekultuvrras dál maiddái vuolledási oahppiide – bargobájit heivehuvvon nuorat mánáide

Dihtosis-prošeavtta áigge leat vásihan, ahte vuolledásiin lea maid dárbu oahppat sápmelaččain.

Elli-Marja Hetta
Sámedikki nuoraidčálli Elli-Marja Hetta mielde prošeavttas leat oaidnán dárbbu viiddidit vuolledásiide. Govva: Xia Torikka / Yle

Sámedikki nuoraidráđi ja Nuoraid Akademiija oktasaš Dihtosis-prošeakta lea viidumin. Dán rádjai skuvlagalledemiid ja bargobájiid leat fállan badjedási ja nuppi dási oahppolágádusaide.

Sámedikki nuoraidčálli Elli-Marja Hetta muitala, ahte prošeakta fállagoahtá bargobájiid vuolledási skuvlla oahppiide.

Prošeavtta ulbmiljoavkkus leat leamašan badjedási ja nuppi dási oahppolágádusaid oahppit, muhto sii leat prošeavtta áigge vásihan, ahte vuolledásiin lea maid dárbu váldit seamma fáttáid ovdan.

– Dasto leat boahtán olu jearahallamat ja gažaldagat das, livččego mis materiála maiddái vuolleskuvllaide, muitala Hetta.

Heivehuvvon bargobájit

Vuolledási skuvllaid bargobájit leat heivehuvvon nuorat mánáide.

– Vuolleskuvlla bargobájiin mii oahpahit sámiid birra smávimus mánáide ivdnengovaid bokte, árbevirolaš máidnasiiguin, lávluma ja stoahkama bokte.

Galledemiin leat seamma ulbmilat, go bajit dási skuvllaid bargobájiin.

– Dasto mis lea boahtimin mobiilaspeallu maiddái, mii lea oaivvilduvvon vuolleskuvlla 4–6. luohkkálaččaide. Dan spealu namma lea Smávva speallu sámiid birra, čilge Hetta.

Dihtosis-bargobájiid sáhttá diŋgot sihke gáiddus- ja lagašgalledeapmin. Gáiddusgalledeamit ollašuhttojit riikkadásis. Lagašgalledeami fas sáhttá diŋgot oaivegávpotguvlui, Turkui, Jyväskyläi, Oului sihke Roavvenjárgii ja daid lagašguovlluide.

Ođđa speallu boađi boađi

Elli-Marja Hetta namuha, ahte sis lea prošeavtta olis gárváneamen ođđa speallu davvisámegillii.

– Mii leat jorgalan ja heivehan dan badjedási ja nuppi dási spealu maiddái davvisámegillii ja dat lea boađi boađi.

Son ávžžuhage skuvllaid váldit dán spealu mielde oahpahussii.

– Dat lea dakkár mii lea maiddái sámeoahppiide ja sámeoahpahussii, ahte dan dasto gánneha váldit oahpahussii.

Lassedieđuid bargobájiid ja skuvlagalledemiid birra gávnnat dáppe.

Guldal dás nuoraidčálli Elli-Marja Hetta jearahallama. Jietna: Laura Pieski / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä