Sápmi |

Guldal jiena: Suoma ođđa árktalaš politihka strategiija olis vuođđudit sámiid dálkkádatráđi

Sámedikki ságadoalli Tuomas Aslak Juuso lea duđavaš dainna mo ovttasbargu strategiijain lea mannan.

Tuomas Aslak Juuso
Sámedikki ságadoalli Tuomas Aslak Juuso oaidná, ahte buriin ovttasbargguin juksá ulbmiliid. Govva: Vesa Toppari / Yle

Tuomas Aslak Juuso mielas Suoma ođđa Árktalaš politihka strategiijas leat sámiid dáfus máŋggat dehálaš girjemat. Okta dain lea sámiid dálkkádatráđđi. Jietna: Aslak Paltto / Yle

Suoma ođđa Árktalaš politihka strategiijas deattuhit sápmelaččaid vuoigatvuođaid. Strategiija lea almmustahtton otne vuossárgga. Dat meroštallá Suoma guovddáš ulbmiliid árktalaš guovllus.

Strategiijas áigot vuoruhit dálkkádatnuppástusa goahcama ja dasa vuogáiduvvama, árktalaš guovllu ássiid, buresbirgejumi ovddideapmi ja eamiálbmot sápmelaččaid rivttiid, árktalaš čehppodaga, ealáhusaid ja alladási dutkama, infrastruktuvrra ja logistihka.

Konkrehtalaš doaibman vuođđuduvvo sámiid dálkkádatráđđi, man bargun lea ovddidit dan, ahte sámiid árbevirolaš diehtu vuhtiiváldojuvvo dálkkádatpolitihkkii laktáseaddji mearrádusbargamis. Árktalaš biebmosihkkarvuođa áigot ovddidit nu, ahte báikkálaš ealáhusaid joatkašuvvan sihkkarastojuvvo erenomážit boazodoalu ja eará árbevirolaš ealáhusaid oasil.

Dasa lassin konkrehta doaibman áigot joatkit ja ovddidit luondduriggodagaid ja suodjalanguovlluid geavaheami oktasašbargomekanismmaid ovttas sámiiguin.

Strategiijas gávdnojit maiddái eará sámiide guoski girjemat.

Sámedikki ságadoalli Tuomas Aslak Juuso lea duđavaš dainna, mo ovttasbargu strategiijain lea mannan.

– Oainnán, ahte lávga oktasašbarggu bokte ulbmiliid sáhttá juksat, muitala Juuso Sámedikki dieđáhusas.

Strategiija lea almmustahtton maid golmma sámegillii.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä