Sápmi |

Guldal jiena: Suoma ruoŧagielat mediat geavahišgohtet Sápmi-sáni sámeguovllu birra – Petra Laiti: "Oainnán dán ovttalágán gudnejahttimin"

Suomas doaibmi ruoŧagielat mediaid oktasaš giellaráđđi lea ávžžuhan, ahte mediat álget geavahit ođđasiin sámeguovllus sámegielat "Sápmi"-nama. Sámeaktivista ja Hufvudstadsbladet kolumnista Petra Laiti illuda mearrádusas, mii guoská mediaid, maid son geavaha olu.

Petra Laiti
Sámeaktivista Petra Laiti okta eatnigiella lea ruoŧagiella. Son čállá ieš ruoŧagillii kolumna Hufvudstadsbladetii ja lea gieskat kolumnasttis čállán dihto sániid rasisttalašvuođas. Govva: Linda Tammela / Yle

Petra Laiti lea duđavaš Suoma ruoŧagielat mediaide addon ávžžuhussii geavahit Sápmi-nama Jietna: Linda Tammela / Yle

Suoma ruoŧagielat mediat geavahišgohtet Sápmi-sáni, dalle go sáhka lea sámeguovllus.

Suoma ruoŧagielat mediaid oktasaš giellaráđđi Mediespråk lea addán ávžžuhusa áššis. Áššis lea čállán vuosttážin Hufvudstadsbladet.

Mearrádusa duogážis lea ovdamearkka dihte dat, ahte dán rádjái geavahuvvon sánit eai gudnejahte sámiid. Máŋggat ovdal geavahuvvon sánit soitet orrut máŋgasiid mielas loavkašuhttit. Dakkár sániid sadjái háliiditge fállát neutrála sániid, mat gudnejahttit olbmuid.

Giellaráđi mielde ruoŧagillii ovdal geavahuvvon sátni Sameland lea boarásmuvvan ja dan geavaheami galggašii garvit.

Svenska Yle sisdoallohoavda Petra Thilman muitala, ahte sii leat aiddo odne ožžon áššis giellarávvaga Svenska Yle iežas giellagáhttejeaddjis.

Petra Laiti illuda, go sutnje dehálaš mediat álge gohčodit su ruovttuguovllu rivttes namain

Sámeaktivista Petra Laitii ruoŧagiella lea goalmmát eatnigiella. Son illudii sakka, go logai Mediespråk ávžžuhusas geavahišgoahtit Sápmi-namahusa ruoŧagielat mediateavsttain.

Laiti čállá ieš ruoŧagillii kolumna Hufvudstadsbladetii ja lea gieskat kolumnasttis čállán dihto sániid rasisttalašvuođas. Kolumnas son maiddái deattuhii, ahte sámeguovllu namma lea Sápmi. "Sápmi. Inte Lappland.", čuožžu Laiti kolumnas.

– Munnje lei hui somá, ahte dakkár mediat, mat leat munnje gárvvisin lagasmediat, álget geavahit mu ruovttuguovllus rivttes nama, Laiti lohká.

– Mu mielas dás lea sáhka maid unnitloguid gaskasaš solidaritehtas, dadjá Laiti.

Laiti čujuha dasa, mot ruoŧagielagiin lea Suomas iežas sátni giellaguvlui, man gohčodit namain Svenskfinland.

Media sátneválljejumiin lea stuorra mearkkašupmi

Dát mearrádus sáhttá leat ovttalágán ovdamearka dál earáge mediaide dakkár sániin, maid geavaheami sáhtášii dálá máilmmis jurddašit ođđasit.

– Oainnán sámegielat namaid geavaheami ovttalágán gudnejahttimin, Petra Laiti smiehttá.

Hufvudstadsbladet čállá artihkkalisttis, ahte sáhka lea das, makkár gova lohkki oažžu sátneválljejumiin: válljego media eanetlogugiela sáni vai unnitlogugiela veršuvnna. Goabbáge guvlui dat lea válljejupmi, jurddaša Laiti.

– Dat addá hui earálágán mearkkašumi das, ahte mas lea sáhka. Dat bokte olbmuid jurddašit eamiálbmogiid geahččanguovllus. Mun anán das issoras stuorra mearkkašumi. Eai vealttakeahttá olbmot álo jurddaš dan, ahte dihto guovlu gullá sámeguvlui ja eai sii jurddaš, ahte dat leat sámiid eatnamat, Laiti čilge.

Laiti mielas dagašiige olu buori, jus vaikkoba váldomediat álggašedje geavahit sámeguovllus dan rivttes nama. Son árvala, ahte válljejupmi váikkuhivčče olbmuid jurddašanvuohkái sámiid birra.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä