Sápmi |

Guldal jiena: Suvi West bagadallan Eatnameamet evttohassan DocPoint jagi buoremus dokumeantan

Eatnameamet – Min jaskes dáistaleapmi lea ovdačájáhusas DocPoint -filbmafestiválas dán vahkuloahpas

Suvi West
Suvi West ođđa dokumeantafilbma Eatnameamet muitala Suoma stáhta sámepolitihkas Govva: Vesa Toppari / Yle

Bagadalli Suvi West ođđa dokumeantafilbma Eatnameamet – Min jaskes dáistaleapmi lea evttohassan jagi buoremus dokumeantan DocPoint-filbmafestiválas. Filbma muitala Suoma stáhta sámepolitihkas ja sápmelaččaid dáistaleamis iežaset álbmoga ja kultuvrra bealis.

Westii evttohasvuohta Suoma dehálamos filbmafestiválain lea stuorrá gudni.

– Dat lea dieđusge gudni beassat dán jovkui gilvalit ja maiddái čájehit dán filmma. DocPointhan lea Suoma stuoramus ja dehálamos arena dokumeanttaide.

– Munnje persovnnalaččat leamašan hui mearkkašahtti, ahte DocPointis ja filbmaindustriijas leat leamašan beroštuvvan dán filmmas. Lean ožžon olu doarjaga sihke ruhtadeddjiid bealis, festiválaid bealis ja muđuige viidásabbot, illuda West.

Guldal dá Suvi West jearahallama. Jietna: Linda Tammela / Yle

DocPoint-Yle-bálkkašumis gilvvohallet oktiibuot čieža suopmelaš dokumeantafilmma ja 11 riikkaidgaskasaš filmma. Gilvvu filmmaid lea válljen DocPoint-festivála dáiddalaš jođiheaddji Kati Juurus. Vuitiid válljejit riikkaidgaskasaš ja suopmelaš dokumeantafilbmasuorggi áššedovdit.

– Háliideimmet čohkket riikkaidgaskasaš gilvoráidui fiinna filmmaid miehtá máilmmi. Sávan, ahte evttohasvuohta – ja dieđusge gilvoráiddu vuoitin – buktá suopmelaš filmmaid oidnosii sihke Suomas ja olgoriikkain, muitala Juurus DocPoint-festivála dieđáhusas.

Bálkkašupmi lea 5 000 euro ja bálkkašumi ruhtada Yleisradio. Geahča buot evttohasaid DocPoint neahttasiiddus.

Eatnameamet – Min jaskes dáistaleapmi -dokumeanta ovdačájáhus lea DocPoint-festiválas.

Yle Sápmi lea okta filmma ovttasbargoguoibmiin.

Varrasamosat: Sápmi

Váldoođđasat

Varrasamosat

Muualla Yle.fi:ssä