Sápmi |

Guldal jiena: Torkel Rasmussen galggai jorgalit ruovttoluotta, go testenbáiki rájá alde manai gitta – odnege galgá vuordit máŋgga diimmu

Njuorggáma ja Gilbbesjávrri rájárasttildanbáikkiin leat šaddan guhkes biilaráiddut, go olbmot vurdet koronatestema. Torkel Rasmussen lea juo nuppádassii ráiddus vuordimin, ahte beasašii teastta bokte viimmat rasttildit rájá.

Torkel Rasmussen
Torkel Rasmussen biilaráiddus maŋŋebárgga iđitbeaivve vuordimin, jus odne beasašii Norgii. Govva: Torkel Rasmussen

Torkel Rasmussen galggai jorgalit ruovttoluotta, go testenbáiki rájá alde manai gitta – odneges galgá vuordit máŋgga diimmu Jietna: Linda Tammela / Yle

Norgga rájá alde koronatestenbáikkiin leamašan hušša Njuorggámis ja Gilbbesjávrris.

Ikte vuossárgga rájá alde ledje máŋgga kilomehtera biilaráiddut, go rádjeguovllu olbmot ja turisttat vurde vuoru koronatestii juobe vihtta diimmu. Dilli ii oro rievdan otnážiige.

Rádjegozihanlágádusas muitalit, ahte Njuorggámis lea vuordimis seammalágán beaivi go ikte ja ráiddus sáhttá gártát vuordit juobe golbma diimmu. Maiddái Gilbbešjávrris gánneha ráhkkanit dasa, ahte galgá vuordit.

Torkel Rasmussen lea rájá alde ráiddus juo nuppádassii

Torkel Rasmussen lea okta sis, geat leat gártán vuordit biilaráiddus.

Rasmussen vástida telefonii Norgga rájá alde Buolbmágis, gosa son lea mánáidisguin boahtán nuppádassii. Rasmussen lei juo ikte eahkes geahččaleamen beassat Norgga beallái, muhto diimmu vuordima maŋŋá rádjebargit muitaledje, ahte testenbáiki giddejuvvo ja olbmot galget biillaidisguin jorgalit ruovttoluotta ovcci áigge eahkedis.

Torkel Rasmussen
Rájá alde lea juo maŋŋebárgga iđđes báhka dálki. Ráiddus leat máŋggat biillat ja ráidu lea olles áigge šaddamin guhkibun. Govva: Torkel Rasmussen

– Dat eai geargan testet buohkaid, bohte vel lasi biillat, kvárta váile ovcci dat bohte ja muitaledje, ahte eai šat váldde eambbo teasttaid. Olbmot galge beare jorgalit ja mannat ruovttoluotta Suoma beallái, Rasmussen dadjá.

Rasmussen muitala, ahte dálges sii galget aŋkke guokte diimmu vuordit ráiddus, ovdal besset testii.

Su mielde olbmuid joavkkus ledje čielgasit turisttat, geat ledje boahtán guhkit mátkki duohken. Dasa lassin rájdjeguovllu olbmot sihke Norggas ja Suomas ledje vuordimin beassat ráji rasttildit.

– Midjiide lei dieđusge dan láhkái álki, ahte ii lean eará go mannat 60 kilomehter ruovttoluotta ja ruoktot.

Teasta vuordá rájá alde, jus ii leat duođaštus boahkuhusas

Norgii boahtti olbmuide dahkkojuvvo Covid-19-teasta rájá alde ja dat galgá leat negatiiva. Boahkuhuspássain beassá njuolga riikii. Testenbáikkis olmmoš galgá čájehit pássa ja registreret, man maŋŋá son testejuvvo. Báikki alde galgá vel vuordit teastabohtosa ja jus dat lea negatiiva, beassá joatkit mátkki.

Risten Rávdná Länsman
Vuossárgga eahkedis govvejuvvon Buolbmágis, Njuorggáma rájá guvlui. Dies lea mátki rájá ala vel sullii 2 kilomehtera. Govva: Risten Rávdná Länsman

Dán rádjái goittotge ovtta rájá alde testejuvvon olbmos lea duođaštuvvon koronavirus Gilbbešjávrris.

Diibmá geasset eandalitge Davvi-Norga geasuhii suopmelaš turisttaid olu.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä