Sápmi |

Guldal jiena: Váhnemiin lea dárbu ságastallat giellaválljemiin gaskaneaset ja danin lágiduvvo ságastallandilálašvuohta

Sávaldat dakkár ságastallamii lea boahtán njuolga váhnemiin, muitala giellabeassebagadalli Petra Kuuva.

Petra Kuuva
Petra Kuuva muitala, ahte ságastallandilálašvuođas váhnemat besset ieža rávvet nuppiideaset. Govva: Anja Kaarret / Yle

Sámi giellarávvehat lágida giellarávvehat- ja veardásašdoarjjadáhpáhusa sámeváhnemiidda. Sámegiella bearraša unnimusaide -prošeakta lea álgán geassemánu álggus.

Giellabeassebagadalli Petra Kuuva muitala, ahte ulbmiliin lea, ahte váhnemat ja fuolaheaddjit beasašedje ságastallat gielaválljemiid ja sámegiela hállamis ruovttus. Sávaldat dakkár ságastallamii lea boahtán njuolga váhnemiin.

– Dego mii diehtit, ahte das lea olu illu, ahte sáhttá hállat sámegiela iežas mánáide, muhto maiddái fuolat, muitala Kuuva.

Váhnemiidda ja fuolaheaddjiide ordnejuvvo ságastallanboddu otne vuossárgga gáiddusin diibmu 10–12. Ságastallan lea rabas buohkaide, muhto lea dárkkuhuvvon erenomážit váhnemiidda, sihke daidda, geat leat vuordimen máná dahje plánemin bearraša álggaheami. Lassedieđuid dáhpáhusas gávnnat Facebookas.

Sámi giellarávvehat lea ordnen ovdal maid ságastallamiid, maid lea sáhttán čuovvut sosiála media bokte, muhto váhnemiidda galggašii ordnet olu eambo doarjaga giellaáššiide, oaivvilda Kuuva.

– Ja ferten dadjat, ahte dat ii leat iešalddes oba dakkár rávven, baicca váhnemat ieža besset rávvet nuppiideaset. Dál mis boahtimin guossin Annika Pasanen, ja sus sáhttá de jearrat rávvagiid.

Guldal dá Petra Kuuva jearahallama. Jietna: Inger-Elle Suoninen / Yle

Divvojuvvon 10.8. dii 10.17: Muitaleimmet vuos, ahte vuossárgga lágiduvvo vuosttas ságastallandilálašvuohta. Vuosttas ságastallandilálašvuohta lágiduvvui goittotge jo geassemánu álggus.

Varrasamosat: Sápmi

Váldoođđasat

Varrasamosat

Muualla Yle.fi:ssä