Sápmi |

Guldal jiena: Vildá duo sáhttá jienastit Eurohpá kommišuvnna musihkkabálkkašumi vuoitin

Hildá Länsman mielas lea stuorra gudni beassat evttohassan dán bálkkašupmái.

Ijahis Idja 2018
Vildá duo lea beaggán miehtá máilmmi vuosttas skearru almmustahttima maŋŋá. Govva: Vesa Toppari / Yle

Ohcejohkalaš juoigi-musihkkár Hildá Länsman ja geasanasčuojaheaddji Viivi-Maria Saarenkylä Vildá duo lea evttohassan Eurohpá kommišuvnna Music Moves Europe Talent -bálkkašumi vuoitin. Eurohpa Uniovdna doarju vuoiti 10 000 euroin.

Gilvvus juhkkojuvvo maiddái Public Choice Award nappo álbmoga válljejupmi -bálkkašumi, man vuoiti eurohpalaččat besset ieža jienastit.

Hildá Länsman illuda evttohasvuođas gilvvus.

– Dat lea hui gelddolaš ja stuorra gudni munnuide. Doppe leat 16 evttohasa miehtá Eurohpa, ja gávcci evttohasa bálkkašuvvojit ja de okta sáhttá vuoitit vel dan Public Choice -bálkkašumi, muitala Länsman.

Evttohasat dán gilvui leat válljejuvvon dan vuođul, olugo artisttat dahje musihkkajoavkkut leat olahan guldaleddjiid miehtá Eurohpa, ii dušše ruovtturiikkas.

Vildá lea ožžon olu fuomášumi olgoriikkain

Vildá duo lea beassan johttit miehtá máilmmi vuosttas skearru almmuheami maŋŋá ja soai leaba ožžon maid olu fuomášumi riikkaidgaskasaš musihkkamáilmmis. Länsman mielde álbmotmusihkka lea globála musihkkagenre.

– Sáme-, folk-, ja álbmotmusihkkárat leat eanáš áigge ožžon iežaset sisaboađu ja bargguid olgoriikkain. Moai beasaime diibmá johttit miehtá Eurohpa ja guktii vel Kanádasge, lohká Hildá Länsman.

Jus Vildá duo vuoitá ruhtabálkkašumi, de nieiddaguovttos áiguba buvttadit ruđain ovdamearkka dihte musihkkavideoid.

– Nu dárkilit ean leat duosttan jurddašit, go dan birrahan ii goassige dieđe, de ii sáhte rehkenastit dan vuoittu ala. Muhto mun jáhkán, ahte dat ruhta manašii munno joavkku ovdánahttimii, smiehtada Länsman.

Guldal olles jearahallama dás. Álbmoga válljejupmi -bálkkašumi vuoitti sáhtte jienastit dáppe.

Guldal olles jearahallama dás. Jietna: Xia Torikka / Yle Sápmi

Varrasamosat: Sápmi

Váldoođđasat

Varrasamosat

Muualla Yle.fi:ssä