Sápmi |

Guldal jiena: Vuohču Sámiid searvi deavdá 50 jagi – ávvudeapmi bistá guokte jagi

Vuohču Sámiid searvi deavdá dán ja boahtte jagi áigge 50 jagi. Searvi ávvuda jorbabeivviid iešguđetlágan bargobájiid ja dáhpáhusaid hámis.

Unna-Maari Pulska
Unna-Maari Pulska joatká Vuohču Sámiid searvvi ságadoallin maiddái jagi 2021. Govva: Unna Pulska priváhtagovva

Jagis 1971 vuođđuduvvon Vuohču Sámiid searvi deavdá 50 jagi ja jorbabeivviid ávvudit guovtti jagi áigge.

– Dalle go searvi vuođđuduvvui 50 jagi dassái, de vuođđudeapmi bisttii guokte jagi. Dan dihte mii mearrideimmet, ahte mii maiddái ávvudit guokte jagi, muitala Vuohču Sámiid searvvi ságadoalli Unna Pulska.

Pulska mielde vuosttaš ávvudanjahki, guhte lea dál, sisdoallá eanet rahkáneami, dego bargobájiid ja uhcit dáhpáhusaid. Jagis 2022 fas šaddá stuorit dáhpáhus.

Koronadilli lea váikkuhan searvvi rahkáneapmái ja ávvudeapmái. Álgojagi koronadili dihte searvvi jahkečoahkkin lea dollojuvvon easkka dál, eaige sii leat bastán bargat jur maidige giđđat.

Dáhpáhusat álget goit ihtit dál go searvi lea beassan fas johtui. Pulska mielde álgo čavčča dahje jo loahppa geasi bealde soitet jo leat muhtun dáhpáhusat.

Vuolggasadjin lea fállat searvvi lahtuide doaimmaid. Dieđu dáhpáhusain sáhttá oažžut šleađgapoastta bokte, Vuohču gili álmmuhantávvaliin ja Facebook-siiddus.

Searvvi ođđa stivra válljejuvvui mannan vahkus

Vuohču Sámiid searvi lea válljen mannan gaskavahkko ođđa stivrra jahkái 2021. Stivra goit bisui measta seammán.

Unna-Maari Pulska joatká sátnejođiheaddjin, ođđa várresátnejođiheaddjin álggaha Juha-Petteri Alakorva ja ođđa čálli-ruhtadoallin válljejuvvui Elli-Marja Hetta.

Stivrra aitosaš lahttun jotket Mika Keskitalo, Inga Koivisto, Jarmo Magga ja Juha Sieppi, ja ođđa stivralahttun válljejuvvui Jukka Palonoja. Stivrra várrelahttun jotket Jenni-Emilia Pehkonen, Tuomas Haapaporras, Anu Virtanen ja Antti Äärelä.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä