Sápmi |

Guldal jiena: Vuosttas sámegielat guhkes mánáidfilbma barggu vuolde – filbma almmustuvvá jagis 2023

Filmma leat čállimin filbmadahkkit miehtá Sámi.

Anne Lajla Utsi
ISFI jođiheaddji Ánne Lájlá Utsi mielde sámefilmmat beroštahttet miehtá máilmmi. Govva: ISFI

Davvi-Norgga seastinbáŋku ja Sámi internašunála filbmainstituhta ISFI ruhtadit ođđa sámegielat mánáidfilmma 4 miljovnna kruvnnain. Dat boahtá leat máilmmi vuosttas guhkes sámegielat mánáidfilbma.

Filbma galggašii gárvánit jahkái 2023, muitala ISFI jođiheaddji Ánne Lájlá Utsi.

– Buvttadeapmi lea jagis 2022 ja vuosttas čájáhus šaddá TIFFas (Tromssa filbmafestivála) jagis 2023.

Filmma vuođđun leat 15 sierra filbmaprošeavtta, main de čohkkejit ovtta guhkes filmma. Utsi sávvá, ahte filmmas bohtet gávdnot sámi iežaset supersáŋgárat.

Okta filmma čálliin ja giehtačállinjoavkku jođiheaddji lea bálkkašuvvon filbmabagadalli Amanda Kernell.

– Mis leat 15 hui buorre idea ja čeahpes filbmadahkkit miehtá Sámi, sihke Norgga, Suoma ja Ruoŧa bealde.

Filmma váras leat ain ohcamin ruhtadeddjiid, muhto Ánne Lájlá Utsi mielde filmmas lea šaddamin nu buorre, ahte son lea sihkkar ruhtadeami gávdnomis.

Sámefilmmat beroštahttet – "Máilbmi ohcala ođđa muitalusaid"

ISFI jođiheaddji Ánne Lájlá Utsi muitala, ahte okta sivva dasa, manin álggahedje dán prošeavtta lea dat, go filbmafestiválat miehtá máilmmi jerret sis sámegielat mánáidfilmmaid.

– Nu mot mii oaidnit dan, de dát lea dakkár álgu. Dat lea vuosttas sámi guhkes filbma mánáide ja nuoraide, muhto dat ii mearkkaš dan, ahte dat galgá leat maŋimuš.

Mánáid filmmaid lassin filbmafestiválat bivdet ISFIs nu olu sámefilbmaprográmmaid, ahte leat bálkkáhan sierra bargi daid čohkkema várás, lohká Utsi.

Su mielde lea iešalddes ovdamunnin go leat vel olu sámi muitalusat, mat eai leat ráhkaduvvon filbman.

– Máilmmi gehččiin lea goiku earálágan muitalusaide. Dat leat gánske gallánan dákkár Hollywood-filmmaide. Máilbmi ohcala earálágan muitalusaid, árvala Ánne Lájlá Utsi.

Guldal Ánne Lájlá Utsi jearahallama dás. Jietna: Arne Ivvar Johnsen / NRK

Varrasamosat: Sápmi

Váldoođđasat

Varrasamosat

Muualla Yle.fi:ssä