Sápmi |

Guldal ođđa prográmmaráiddu fámolaš sámi nissoniin – "Saamen tyttäret" dál Yle Areenas ja lávvardaga rájes rádios

Yle ođđa jietnaprográmmaráidu ”Saamen tyttäret” muitala nana ja roahkkadis sámenissoniin, geat dáistalit kultuvrraset bealis.

Hilda Länsman
Musihkkár Hilda Länsman lea okta dain nissonolbmuin geat leat mielde rádioprográmmaráiddus “Saamen tyttäret”. Govva: Laura Pohjanvirta / Yle

Yle lea buvttadan ođđa jietnaprográmmaráiddu Saamen tyttäret, man sáhttá otná bearjadaga rájes guldalit Yle Areenas ja ihttá lávvardaga rájes Yle Radio Suomi -kanálas. Prográmma gullo rádios lávvardagaid diibmu 12.15.

Suomagielat prográmmaráidu muitala nana ja roahkkadis sámenissoniin, geat dollet gitta iežaset eallinvuogis ja kultuvrras, ja dáistalemiin, maid sápmelaččat šaddet olles áiggi geavvat sámevuođa bealis.

Ráidu sisttisdoallá guhtta oasi, main juohkehaš bistá 10–15 minuhta.

Mielde guhtta nana sámenissona

Prográmmaráiddu vuosttas oasis lea mielde gulahallanolmmoš, helssetlaš Erja Morottaja, gean máttut leat Gápmasis Anáris. Prográmma gieđahallá earret eará dan, manin sámegákti boastto oktavuođas buollaha somesoađi. Fáddán leat maiddái eará váttis áššit sápmelaččaid ja váldoálbmoga gaskkas.

Nuppi oasis mielde lea musihkkár Hilda Länsman Ohcejogas. Son muitala earret eará juoiganárbevieru seailluheamis ja ođasmahttimis.

Goalmmát oasis mielde lea árrabajásgeassinámmátolmmoš Saana Guttorm Helssegis. Son hállá mánáidkultuvrras ja dasa laktáseaddji albmanemiin.

Njealját oasis mielde lea doavttir Heidi Eriksen Ohcejogas. Son muitala iešsoardimiid eastadanprošeavttas. Iešsoardimiidda leat máŋggat sivat, ja sápmelaččaid gaskkas leat viehka alla iešsoardinlogut.

Viđát oasis mielde lea museaamanueansa Anni Guttorm Anáris. Son liiko dološ sámegálvvuide ja earret eará ládjogahpira guoski áššiide.

Guđát oasis mielde lea Sámedikki ságajođiheaddji Tiina Sanila-Aikio. Son muitala sámeguovllu guoski birasáitagiin ja das, mo mearrideaddjiid diehtemeahttunvuohta sámeáššiin áitá olles sámekultuvrra.

Lassin vel guhkes jietnadokumentára

Guđaoasat prográmmaráiddu lassin Yle lea buvttadan maiddái guhkes jietnadokumentára Saamen tyttäret eivät taivu.

Maiddái dán prográmma beassá bearjadaga rájes guldalit Yle Areenas. Rádios dokumentára gullo Yle Radio 1 -kanálas sotnabeaivve 10.11. diibmu 18.00 ja nuppádassii duorastaga 14.11. diibmu 22.05.

Maiddái dán dokumentáras leat mielde Hildá Länsman, Heidi Eriksen, Saana Guttorm, Erja Morottaja, Anni Guttorm ja Tiina Sanila-Aikio.

Prográmmaid doaimmaheaddjin leamaš Päivi Leino ja jietnaplánejeaddjin Kai Rantala.

Varrasamosat: Sápmi

Váldoođđasat

Varrasamosat

Muualla Yle.fi:ssä