Sápmi |

Guldal ságastallama: Davviriikkaid ráđi bálkkašumit eai dán háve Sápmái – girječállit eaba menddo sakka das váivvášuvvan

Niillas Holmberg ja Karen Anne Buljo leigga mielde gaskavahku Buorre Iđit Sápmi -sáddagis.

Niillas Holmberg
Niillas Holmberg lea sihke musihkkár ja diktačálli, muhto maiddái mielde earáge dáiddasurggiin. Govva: Linnea Rasmus / Yle

Davviriikkaid ráđi bálkkašumit juhkkojuvvojedje maŋŋebárgga 27.10. Sámit eai goittotge ožžon dán háve bálkkašumiid.

Girjjálašvuođabálkkašumi evttohassan Sámis lei diktačálli ja musihkkár Niillas Holmberg diktačoakkáldagainis Juolgevuođđu (2018). Nuppi kategoriijas nuoraid- ja mánáidgirjjálašvuođa bálkkašumi evttohassan lei girječálli Karen Anne Buljo ja dáiddár Inga-Wiktoria Påve govvagirji Guovssu guovssahasat (2019). Påve lea maiddái ráhkadan govaid Holmberg diktačoakkáldahkii.

Girjjálašvuođabálkkašumiid ožžo dán jagi Monika Fagerholm, Jens Mattsson, Jenny Lucander, Dag Johan Haugerud, Yngve Sæther, Sampo Haapamäki ja Jens-Kjeld Jensen.

Buljo lohká leat hui giitevaš, vaikko bálkkašumi ii dán háve ožžonge. Holmberg lea maiddái movttegis mielain. Buljo mielde lea stuorra gudni ja dehálaš, ahte sámi girjjálašvuohta obalohkái gávdno mánáide ja girjelágádusat buvttadit daid.

– Lean duđavaš, ahte mii beassat iežamet čeahpes sámi lágádusaid bokte adapteret dološ muitalusaid girjji hápmái, čilge Buljo.

Påve lei fárus NRK veaigesáddagis ikte maŋŋebárgga, Buljo ja Holmberg fas mielde odne gaskavahku Buorre Iđit Sápmi -sáddagis.

Jearahallamiid beasat guldalit dás:

Davviriikkaid ráđi bálkkašumit eai dán háve Sápmái – girječállit háleštedje Buorre Iđit Sápmi -sáddagis Jietna: Kjell Are Guttorm, Joni Saijets / NRK, Jouni Aikio / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä