Sápmi |

Guldal válgaságaid Vuohčus: giliolmmoš sávvá olbmot jienastit dakkára, guhte dovdá bures boazodoalu

Yle Sápmi finai bearjadaga Vuohčus gulaskuddamin, mas olbmot hállet ovdal válggaid. 

Antti Äärelä, Vuohčču, Vuotso
Antti Äärelä vuordá, ahte Soađegili váldostivrii válljejuvvon olbmot muitet maiddái boazodoalu dárbbuid. Govva: Maiju Saijets / Yle

Vuohču gilis olbmuid ságastahttet dábálaš beaivválaš dárbbut: makkár bálvalusat leat fállun gilis, leago gilis skuvla ja fertego bálvalusaid maŋŋái vuolgit Soađegili girkosiidii.

Vuohčču lea Suoma Sámi máttimus gilli. Soađegili gielddas dat gullá goittotge gieldda davvi osiide, davvelis leat dušše Tankavárri, Burdnomohkki ja Kakslauttanen gilážat.

Vuotso
Vuohču gilis leat vehá birrasiid 330 ássi ja sis jietnavuoiggadahtton olbmot leat váile 300. Govva: Maiju Saijets / Yle

Oppalohkái Soađegilis leat buohkanassii 92 gielddaválgaevttohasa ja Soađegili davvi osiide sis gullet dušše njealjis.

Boazodoallu ja bálvalusat leat sutnje dehálaččat

Vuohčulaš Antti Äärelä namuha, ahte son ii leat velá jienastan dáin válggain, muhto áigu goit jiena fitnat addimin sotnabeaivve go lea aitosaš válgabeaivi.

Su jiena oažžu olmmoš, guhte dovdá bures báikki áššiid.

– Galhan dasa váikkuha dat, ahte son čohkká doppe váldostivrras, dovdá bures báikki áššiid. Sus lea gullevašvuohta guvlui, muhto ii vealtameahttumit dárbbaš leat vuohččulaš, čilge Äärelä.

Äärelä muitala, ahte Vuohčusge leat muhtin veardde evttohasat oidnon válgabarggu bargamin, muhto ii evttohasaid jienaid guolásteapmi su válljejumiide váikkut.

Äärelä vuordá, ahte boahttevaš váldostivra ja dohko válljejuvvon olbmot fuolahivčče gieldda davvi osiid bálvalusain ja válddášedje guovllus dehálaš ealáhusaid vuhtii.

– Sávan, ahte dáppe olbmot jienastit dohko dakkár olbmuid, geat dovdet boazodoalu buoremusat.

Jouni Aikio galledii Vuohčus gulaskuddamin, ahte mii doppe lea dehálaš olbmuide go válljejit gean jienastit válggain. Jietna: Jouni Aikio, Erkki Gauriloff

Evttohasaid oaiviliidda sáhttá oahpásmuvvat Yle válgafálaldagaid bokte

Gielddaválgaevttohasaid oaiviliidda sáhtát oahpásmuvvat Yle válgamašiinna bokte. Válgamašiidna lea fállun suomagillii, ruoŧagillii, eaŋgalsgillii, ruoššagillii ja davvisámegillii. Davvisámegielat gažaldagat leat fállun sámeguovllu gielddain Anáris, Eanodagas, Ohcejogas ja Soađegilis, ja dasa lassin Suoma stuorimus gávpogiin dego Helssegis, Tamperes, Turkus, Jyväskyläs, Oulus ja Roavvenjárggas.

Kuntarundi-nammasaš válgaságastallamiid sáhttá guldalit Yle Areenas. Kuntarundis leat 294 oasi, main beassá vuodjut iešguđet gielddaid politihkalaš gažaldagaide. Juohke oasis leat golbma evttohasa ságastallamin ja ságastallama jođihit Yle guovlodoaimmaheaddjit.

Yle Sápmi lea buvttadan ságastallamiid sámegielddain ja Ohcejoga gieldda oasil ságastallan lea ordnejuvvon sihke davvisáme- ja suomagillii.

Gielddaválggat doaimmahuvvojit geassemánu 13. beaivve.

Yle Ođđasiid Sámis ja Beaivvi ságaid sáhtát maid guldalit Yle Areenas.

13.6.2021 d.. 12:35 lasihuvvon govva Vuohču gilis.

Varrasamosat: Sápmi

Váldoođđasat

Varrasamosat

Muualla Yle.fi:ssä