Sápmi |

Gumpe gottii beatnaga Anáris gieskat – Maŋimus logi jagi áigge Lappis leat buhtadan njeallje beatnaga maid gumpe lea goddán

Maŋimus logi jagi áigge boraspire dahkan vahágiin leat buhtten oktiibuot vihtta beatnaga.

Susi Ähtärin eläinpuistossa
Gumpe Ähtäri ealligárddis. Arkiivagovva. Govva: Pasi Takkunen / Yle

Váile guokte vahku dassái Anára Čaarmauaivai meahcceguovllus gumpe gottii beatnaga, mii lei mielde meahcástanbarggus. Fuođđovahátregistera mielde dát lea njealját beana, man gumpe lea goddán Lappi guovllus maŋimus logi jagi áigge.

Ovddit dáhpáhus lea jagis 2013, go gumpe gottii beatnaga Salla guovllus. Dan ovdal jagis 2012 gumpe gottii beatnaga Durdnosa guovllus ja jagis 2011 fas Soađegili guovllus.

Anára gieldda eanandoalločálli Minna Pulju muitala, ahte sidjiide lea boahtán almmuhus das, ahte Anáris gumpe lea goddán beatnaga. Son muitala, ahte gaikun- ja borranluottat čájehit, ahte sáhka lea gumppes.

– Galhan dan boraspire sáhttá árvvoštallat das, makkár gaikunluottaid dat guođđá sállašii ja dain borranluottain. Dán dáhpáhusas doppe leamašan maiddái muohta eatnamis, ahte boraspire luottat leat báhcán dohko, muitala Pulju.

Dán dáhpáhusa dihte eai boađe makkárge doaibmabijut gumppe ektui, dasgo sáhka lea ovtta dáhpáhusas, muitala Pulju.

– Jos gii nu háliida dakkár eallái ohcat goddinlobi, daid gieđahallet fuođđoguovddážis.

Boarráset rihkuskonstábel Iikka Rantahalvari Anára bolesis muitala, ahte ášši lea maiddái sin dieđus iige dat gáibit doaimmaid bolesis. De livččii eará dilli, jus livččii sáhka máŋgga dáhpáhusas dahe jus gumpe jorešta lahka orrunguovllu.

– Jus gumpe boahtá orrunguvlui johtit, de dat dagaha midjiide maiddái doaibmabijuid. Vuosttažettiin ádjit dan gumppe eret.

Rantahalvari muittuha, ahte buot akuhtta várradiliin ja eandalii dakkár diliin, mat gusket olbmuide, galgá almmuhit bolesii ja jus lea heahti, de heahteguovddážii.

Eanandoalločálli Minna Pulju goit muittuha, ahte dát lea ovttaskas dáhpáhus, ja ahte velge lea dorvvolaš meahcástit.

Gumppe goddin beatnagis sáhttá ohcat buhtadusaid

Minna Pulju muitala, ahte buot ruoktoeallivahágiid dárkkistit. Sáhka lea maid ovdamearkka dihte sávzzain. Son maid lohká, ahte jus dákkár vahágat dáhpáhuvvet, livččii buorre guođđit beatnaga dohko, gos vahát lea dáhpáhuvvan, vai de sáhttet duođaštit dili báikki alde.

Dilli lea váttis, jus vahágat dáhpáhuvvet virgeáiggi olggobealde, iige sáhte sihkkarastit dan, ahte beana dahje eará ruoktoealli lea vel doppe dalle go báikki ala bohtet dahkat dárkkisteami.

– Álot lea buorre govvet buot duođaštusaid, mat doppe luonddus leat leamašan, muitala Pulju.

Jus dákkár vahát dáhpáhuvvá, galgá váldit oktavuođa gieldda eanandoalloeiseváldái ja das sáhttá dieđihit maiddái fuođđodikšunsearvái. De eiseváldi ordne dárkkisteami ruoktoeallivahágiidda. Vahága gillájeaddji de guođđá buhtadusohcamuša gildii, gos dat de gieđahallojuvvo, muitala Pulju. Son lasiha, ahte bohccuin goit lea eará geavadat.

Fuođđovahátregistera mielde maŋimus logi jagi áigge boraspire dahkan vahágiin leat buhtten oktiibuot vihtta beatnaga. Daid njealje gumppe goddin beatnaga lassin guovža lea goddán ovtta beatnaga. Buhtadusaid leat maiddái máksán, go jagis 2011 albbas lea fallehan beatnaga, muhto beana ii leat jápmán.

Árat dán čávčča Ávvir-aviisa muitalii dan birra, go Kárášjogas guovža borai beatnaga. Maŋŋelis goit Ávvir muitalii, ahte guovža- ja gumpebivdit jáhkket dat lei gumpe, mii borai beatnaga.

Golggotmánus maid Yle muitalii gumppe dagahan beanavahágiin go Kuhmo guovllus gumppet borre beatnaga.

Varrasamosat: Sápmi

Váldoođđasat

Varrasamosat

Muualla Yle.fi:ssä