Sápmi |

Guoládatnjárgga boazodálut buktigohtet bierggu Supmii – dán ovdal Ruoššas leat bohccobiergu buktán dušše Jamala guovllus

EU lea mieđihan Guoládatnjárgga fitnodagaide vuosttas lobi bohccobierggu buktimii. Lujávrilaš boazoeaiggádiid oasusgoddi Tundra lea vuolláičállán soahpamuša bohccobierggu buktimis roavvenjárgalaš Pokka Reindeer Hides fitnodagain. Suomas boazodoallit ballet boazodoalu šaddat vel váddásut dillái.

Poro.
Guoládatnjárggas leat sullii 40 000 bohcco. Dain bohccuin njuvvo dušše smávva mearri, go doppe eai leat márkanat bohccobirgui. Govva: Lev Fedoseyev / AOP

Guoládatnjárgga bohccuid vuovdimis Supmii ságastallojuvvui vuossárgga Ásllaga Á-studios. Mielde sáddagis leigga Reindeer-fitnodaga várreságadoalli Andrei Dubovtsev ja Sámebálgosat-ovttastusa ságadoalli Tiina Sanila-Aikio. Jietna: Aslak Paltto / Yle

Tundra oasusgoddi Lujávrris sáddii cuoŋománus Supmii 8,5 tonna teastameari bohccobierggu. Tundra lea ožžon lobi vuovdit bierggu Eurohpa Uniovnnas, muitala fierpmis doaibmi láđđi Barenst Observer.

Tundra lea okta Murmánskka guovllu stuorámus boazoeaiggádiid oasusgottiin. Tundra sáddii vuosttas 321 bohccorohpa cuoŋománus, nanne guovllu luondduriggodat- ja birasministeriija.

Barents Observer mielde Eurohpa Uniovdna mieđihan sertifikáhta addá boazodoalu oasusgoddái vejolašvuođa beassat doalvut biergobuktagiid Suoma lassin earáge Eurohpa riikkaide.

Tundra sádden biergomearri dagai Murmánskka birrasis Ruošša nubbi guovllu, geas lea vuoigatvuohta sáddet bohccobierggu Eurohpa Uniovdna riikkaide. Ruoššas leat ovdal sádden bohccobierggu Jamala Nenetska autonomalaš bires, muitala Barents Observer.

Roavvenjárgalaš fitnodat leat dahkan soahpamušaid

Tundra lea vuolláičállán soahpamuša bohccobierggu buktimis roavvenjárgalaš Pokka Reindeer Hides fitnodagain. Pokka Reindeer Hides fállá viessogálvvuid- ja náhkkebuktagiid.

Soahpamuša mielde Tundra sádde roavvenjárgalaš fitnodahkii dán jagi juoba 50 tonna bohccobierggu ja guhkes áiggi ulbmilin lea bajidit bierggu buktima 100 tonnii jagis, čállá Barents Observer.

Reindeer oasussearvi lea maid gárvvis jođihit bierggu Eurohpái ja Norgii. Reindeer fitnodat vuolláičálii seammalágan lobi vuovdit bierggu Eurohpa Uniovdnii dán jagi guovvamánus.

Reindeer-fitnodaga várreságadoalli Andrei Dubovtsev muitala Ylei, ahte dat leat maid dahkan soahpamuša Pokka Reindeer Hides fitnodagain ja buktigoahtá bohccobierggu Supmii boahtte jagi 2022. Fitnodat ráđđádallá vejolašvuođaid doalvut bierggu maid Norgii guovdageaidnulaš Finnmark Rein fitnodagain.

Dubovtsev muitala, ahte fitnodat leat čađahan garra gáibádusaid ovdalgo ožžui lobi doaimmahišgoahttet bierggu Eurohpa Uniovdnii.

Njuovván, vuovdin ja loahpalaš buktagat bohccobierggus ledje sidjiide oahppása, go Lujávrri njuovahaga oamastii ovdal suopmelaš-ruoŧŧelaš Polarica fitnodat.

– Polarica oahpásmahtii báikkálaš boazoeaiggádii eurohpalaš virggálaš vugiide das, mo berre elliid dálkkodit ja mo váldit vuhtii hygienanjuolggadusaid, muitala Dubovtsev.

Pokka Reindeer Hides -fitnodaga beaivválaš jođiheaddji Harri Pokka nanne Yle Sápmái dan, ahte sis lea soahpamuš Tundrain ja álgosoahpamuš Reindeer-fitnodagain lea dahkkon. Pokka ii muital dárkilut biergomeriid. Son goittot deattuha, ahte mearit leat prosentuálalaččat uhcit.

Guoládaga fitnodagaide rahpasit stuorra márkanat

Guoládatnjárggas leat sullii 40 000 bohcco. Dain bohccuin njuvvo dušše smávva mearri, go doppe eai leat márkanat bohccobirgui. Báikkálaččaid mielas biergu lea menddo divrras ja sii eai muđuige ane árvvus bohccobierggu.

Ruoššas bierggus mákset njuovahatkilos sullii 360 rubela, mii lea 3,5 euro. Suomas biergohaddi lei mannan jagi 7–8 euro.

Guoládatnjárgalaš giláža Lujávrri ekonomiija buorrána go riikkaidgaskasaš márkanat rahpasit. Dat lea dehálaš smávva gilážii. Lujávri lea guovllu sápmelaččaid guovddáš ja sin váldo ealáhus lea boazodoallu, čállá Barenst Observer.

Ođas ii movttiidahte Suoma boazodoalu, baicce buktá guolddu

Ovddit dálvvi váttis muohtadilli dagahii stuorra dáhpaid Suoma boazodollui. Dan lassin korona bissehii turisma Sámis. Go turisma váillui, de fitnodat eai šat oastán bohccobierggu dego ovdal.

Sámebálgosat-ovttastusa ságadoalli Tiina Sanila-Aikio lea fuolas go Ruoššas boktigohtet ain eanet bohccobierggu ja dat fas fuotnuda dili Suoma bohccobiergomárkaniin.

– Min bierggu lea buorre ja dat beaggá Suomas. Mii leat boazodoalus rahčan dan ovdii. Mii leat bidjan searaid beaggimii ja dál váikkuha nu, ahte eai šat stuorra biergooastit hálit joatkit seamma bálgá mielde minguin. Hattit leat hálbun ja márkaniin doaibmit lassánan.

Sanila-Aikio háliidivččii, ahte boazobierggus váldošii atnui merken mii muitala, gos biergu lea boahtán.

– Kundariin lea vuoigatvuohta diehtit, gos bohccobiergu lea boahtán seamma láhkai go earáge biergu, dadjá Sanila-Aikio.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä