Sápmi |

Guovdageidnui áigot huksehit dubbenstudio vai sáhttet dubbet eanet sámegielat filmmaid Sámis

Sámi dubbensuorgi stuorru, ja dál leage dárbu oažžut Sápmái iežas dubbenstudioid.

Anne Lajla Utsi
Internašunála Sámi filbmainstituhta jođiheaddji Anne Lajla Utsi sávvá Guovdageainnu dubbenstudio leat anus jo boahtte jagi. Govva: ISFI

Guovdageidnui áigot hukset sámi dubbenstudio ođđa sámegielat filmmaid várás, muitala Sameradion ja SVT Sápmi.

Internašunála Sámi filbmainstituhta (ISFI) jođiheaddji Anne Lajla Utsi muitala, ahte ISFI lea gearggus huksehišgoahtit Guovdageainnu dubbenstudio juo boahtte jagi. Ulbmilin lea hukset alladását jietna- ja editenstudio vai boahttevuođas sáhttet dubbet eanet ođđa sámegielat filmmaid Sámis.

Plánat leat jo buori muttus, muhto ollu lea ain bargu, ovdalgo dat ollašuvvet. Studio ceggen lea ain ruhtadeamis gitta, muhto Utsi ii jáhke leat veadjemeahttun oažžut dan čoahkkái.

– Lean sihkkar, ahte nagodit dan ollašuhttit. Dárbbašit dušše ovtta vistti, masa sáhttit cegget rusttegiid, muitala Utsi.

Divrras girddihit jietnaneavttáriid máttás

Sámegillii dubbejuvvon filmmat eai leat gallis. Danin ISFI lea ovddidišgoahtán Sámi dubbensuorggi.

Dál de sáhttit vuordit davvisámegielat Jikŋon II -filmma vuosttaseahkeda, mii lea juovlabeaivve 25.12. oktanaga eará davviriikkalaš gielaiguin. Boahtte jagi álggus fas lea vuosttasčájáhus davvisámegillii dubbejuvvon Spirited Away -guhkesanimašuvnnas.

Maŋimuš sámegillii dubbejuvvon filbma, Mumeniid diidadálvi, ilmmai jagis 2017.

Dubbenprošeavttain leat gávnnahan dárbbu Sámi iežas dubbenstudioi. Ovdamearkka dihtii davvisámegielat Jikŋon II -filmma dubbemis hástalussan leamašan guhkes mátki studioi. Stuorra sámegielat jietnaneavttáriid joavkku leat gártan girddihit Mátta-Norgii.

– Hástalus lea, ahte studiot eai leat Sámis, buot leat máddin. Filmmas sáhttet leat logit neavttárat ja dat šaddá menddo divrrasin, dadjá Utsi.

Plánain hukset dubbenstudioid miehtá Sámi

Jus áššit ovdánit plána mielde, Guovdageainnu dubbenstudio lea anus jo boahtte jagi.

Guhkit áiggi plánan livččii hukset jietnastudioid miehtá Sámi vai sáhtášedje buvttadit filmmaid buot sámegielaide.

– Filmmaid dubben lea beaktilis vuohki nannet giela ja fidnet jođánit filmmaid sápmelaččaide, dadjá Internašunála Sámi filbmainstituhta jođiheaddji Anne Lajla Utsi.

Varrasamosat: Sápmi

Váldoođđasat

Varrasamosat

Muualla Yle.fi:ssä