Sápmi |

Guttorm: Deanu soahpamuš bissehuvvon goit moatte vahkui

Ohcejohkalaččaid sáttagoddi lea fitnan eanan- ja meahccedoalloministtara ságain ja buktá dearvuođaid, ahte Deanu soahpamuš livčče bissehuvvon goit moatte vahkui.

Veikko Guttorm
Veikko Guttorm muitala, ahte Suoma eanan- ja meahccedoalloministtar Kimmo Tiilikainen dajai bearjadaga, ahte juos Norga bisseha Deanu soahpamusášši, de Suopma vuolgá fárrui. Govva: Vesa Toppari / Yle

Deanu soahpamuša ovddideapmi lea bearjadaga bissehuvvon goittot moatte vahkui, muitala Veikko Guttorm Njuorggáma guolastangottis.

Son dadjá, ahte dál lea Norgga eanandoalloministtara duohkin, mo ášši ovddiduvvo.

Deanu soahpamuš
Áššis muitaluvvui bearjadaga Ohcejoga guolástangottiid ovddasteaddjiide ja gielddahovdii, go sii deaivvadedje Suoma eanan- ja meahccedoalloministtara Kimmo Tiilikainen joavkkuinis. Govva: Veikko Guttorm
Áššis muitaluvvui bearjadaga Ohcejoga guolástangottiid ovddasteaddjiide ja gielddahovdii, go sii deaivvadedje Suoma eanan- ja meahccedoalloministtara Kimmo Tiilikainen joavkkuinis.

Deaivvadeamis ledje mielde Veikko Guttorm Njuorggáma guolastangottis, Anne Nuorgam Veahčat guolástangottis, Antti Katekeetta Vuovdaguoikka guolástangottis, Ohcejoga gielddahoavda Vuokko Tieva-Niittyvuopio, eanan- ja meahccedoalloministtar Kimmo Tiilikainen, su erenaomašveahkki Jukka-Pekka Kataja, Deanu soahpamušráđđádallanjoavkku ságadoalli Pentti Lähteenoja, eanan- ja meahccedoalloministeriija ráđđádalli virgeolmmoš Tapio Hakaste ja Lappi riikkabeaiáirras Markus Lohi (guovd).

"Tiilikainen logai son ferte ieš riŋget iežas kollegai"

Veikko Guttorm muitala, ahte Suoma eanan- ja meahccedoalloministtar Kimmo Tiilikainen dajai bearjadaga čoahkkimis, ahte juos Norga bisseha Deanu soahpamusášši, de Suopma vuolgá fárrui.

– Mii hálešteimmet ja ministtar logai dan láhkai, ahte son lea gullan šláddariid, ahte Norga áigu geassádit dán soahpamušas, soahpamuša ovddideamis ja logai son ferte ieš riŋget iežas kollegai ja jearrat mii lea Norgga dáhtu dán hárrái. De mun áddejin dan láhkai, ahte juos Norga ii joatke dáid ráđđádallamiid, ovddosdoalvuma, de boahtá boddu. Suopma čuovvola dasa fárrui ja dál ii leat eará vuordit maid Norgga bealde dahká dán Deanu soahpamušášši ovddideapmai, Guttorm muitala.

Na man guhká don jáhkát, ahte dát boddu bistá?

– Dat bođii dan ministtaris ovdan, dat ahte dát soahpamuša vuolláičállin sirdašuvvá dal sullii mottiin vahkuin. Vuolláičállin galggai leat dáid beivviid, muhto dat leat vehá sirdán. Mun jáhkán, ahte dat lea dan sivas, ahte gulasguddat mii Norgga dáhttu lea soahpamuša ovddideapmái. Ja juos Norga gaskalduhttá daid soahpamušráđđádallamiid, de Suopma vuolgá dasa fárrui. Eat mii šat dieđe man guhká dat ráđđádallet ja maid dat ráđđádallet, muhto diekkár dat lea dán háve dat dilli dán áššis, Guttorm dadjá.

Ministtara veahkki nanne dieđu vuolláičállima maŋideamis – "Sisdoallui eai leat guoskamin"

Deanu soahpamušráđđádallanjoavkku ságadoalli Pentti Lähteenoja ii nanne dieđu soahpamuša bisseheamis, muhto dadjá ahte sis leamašan čoahkkin Deanu soahpamuša olis.

– Dát lea politihkalaš gažaldat ja politihkalaš ášši. Muhto jos áigumuš lea, ahte ođđa soahpamuš galgá leat fámus boahtte guolástanbajis, nu láhka ferte leat nannejuvvon njukčamánus, dadjá Lähteenoja.

Eanan- ja meahccedoalloministtara erenoamašveahkki Jukka-Pekka Kataja nanne dieđu das, ahte vuolláičállin lea maŋiduvvon mottiin vahkuin.

Son dadjá, ahte dát ii goittotge mearkkaš dan, ahte soahpamuša sisdollui livčče guoskamin.

– Mii máhccat áššai lagamus vahkuid áigge, Kataja dadjá.

"Soahpamuša galggašii álgit fas álggus"

Veikko Guttorm mielas Deanu soahpamušráđđádallamiid galggašii álggahit álggu rájes.

– Na dat lea oainnat dakkár dilli, ahte dan ferte dan soahpamuša gaskalduhttit ja álgit fas álggus. De go dat lea vuolláičállojuvvon, de dan ii sáhte šat váldit ja divodit gaskas, de dan ferte heaitit eret ja álggahit fas álggus, Guttorm oaidná.

Varrasamosat: Sápmi

Váldoođđasat

Varrasamosat

Muualla Yle.fi:ssä