Sápmi |

Hálidedje oaidnit olles Deanu ja vudje čáhceskohteriin Deanuvuonas Kárášjohkii

Vahkuloahpas gávcci olbmo joavku vulggii goargŋut Jiekŋameara Deanuvuonas Deanu bajás čáhceskohteriiguin. Viššalamosat sis vudje gitta Kárášjohkii.

Jietna: čáhceskohterat
Jietna
Guldal Uula-Petteri Somby jearahallama čáhceskohtertuvrra birra dás. Jietna: Yle Areena. Govva: John Stian Moeng

Gávcci čáhcejet-mašiinna cirgguhedje vahkuloahpas Deanunjálmmis Gáregasnjárgga guvlui. Uula Petteri Somby lei okta guhte vujii Deanu bajás.

– Vuoddjáimet Deanuvuonas bajás ja vujiimet gitta Gáregasnjárgii Deanu alde. Finaimet vel Kárášjogas mohki.

Jurdda lei vuos vuodjit ovttatmano olles mátkki. Gávcci olbmo joavku ii goit lávvardaga beassan vuolgit nu árrat go lei dárkkuhus, ja de mearridedjege ijastit Njiljogas Dálvadasas. Oassi joavkkus heittii tuvrra dasa ja earát jotke mátkki sotnabeaivve.

Uula-Petteri Somby
Uula-Petteri Somby lei okta sis, guhte vujii čáhceskohteriin Jiekŋamearas gitta Gáregasnjárgii ja finai vel mohki Kárášjogas Govva: Priváhta

Máŋgasat leat sihkkarit imaštallan, mii ulbmiliid dán reaissus leamašan. Oaivil lei gul geahčadit Deanu.

– Guhká leamašan juo miella oaidnit olles dan Deanu joga ja oaidnit makkár dat lea doppe, muitala Somby tuvrra sivain.

Dán áigge jođánis máilmmis ii šat olmmoš vealttakeahttá gille goarkŋu johtit olles Deanu, go jođáneappotge beassá.

– Hui guhká leamašan miella juo fatnasiinge fitnat doppe. Ii dat dieđus fatnasiin leat nu álki ja dat váldá olu áiggi. Duokkár vuojániin dat ii dárbbaš nu guhká, dat lea hui jođán.

Ii gopmánan oba Vuollegeavgŋásge

Geavgŋát dat ledje gelddolamosat dán tuvrras.

– Gal dan Vuollegeavgŋá lei hui somá vuodjit bajás, oalle bárut gal ledje doppe, muhto dat manai bures. In mun jorihan gal oktiige, muhto bealljebilttuid mun láhppen dohko Vuollegeavgŋái, go njuikehin daid báruid gaskka, dat gal lahppojedje, muhto eará bárttit gal eai lean.

Guhkes savvonat gal ledje láitasat vuodjit. Danin ii Somby jáhke, ahte juohke jagi gal vuolggášii dakkár tuvrii.

– Iihan dat gal leat somá vuodjit eará go dan Badjegeavgŋá rádjai. Das bajás dat leat dušše savvonat.

Uula Petteri Somby ii jáhke, ahte dát vuojašeapmi ráfehuhtii luonddu nugo guliid dahje lottiid. Álo dieđus soapmásat leat negatiivvalaččat dákkár hommáid ektui, árvala son.

– In mun gal jáhke, ahte ráfehuhttá luosa dahje lottiid dađe eambo go dábálaš johkamohtorat, oaivvilda Somby.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä