Sápmi |

Heahtá dearvvašvuođadálus dutket vejolaš sisáibmováttisvuođaid – laboratoria fárre eará vissui

Laboratoria doaibmagoahtá boahtte vahkku álggu rájes Osuusbáŋku-viesus Heahtá giliguovddážis.

terveysasema hetta enontekiö
Govva: Anni-Saara Paltto / Yle

Laboratoria fárre eret Heahtá dearvvašvuođadálus vejolaš sisáibmováttisvuođaid geažil. Nordlab-laboratorio doaimmahushoavda Rauno Luttinen muitala, ahte laboratoria bargi lea buohcan olu heajos sisáimmu geažil ja danne mearridedje fárret dearvvašvuođadálus eret.

– Laboratoria doaibmagoahtá boahtte vahkku álggu rájes Osuusbáŋku-viesus Heahtá giliguovddážis. Ulbmil lea fállat seamma bálvalusaid go dánge rádjái iige doaibma boađe hehttet moge viesu eará doibmiid, dadjá Nordlab doaimmahushoavda Rauno Luttinen.

rauno luttinen nordlab
Nordlab doaimmahushoavda Rauno Luttinen. Govva: Nordlab

Viesus doibmet Osuusbáŋkku lassin Yle Sápmi ja Enontekiön Sanomat -aviisa.

Gielda diŋgon viiddis sisáibmodutkamušaid

Eanodaga gielda lea olles leavttuin ordnemin laboratoriai sadjásaš lanjaid Osuusbáŋku-viesus. Gieldda huksenmeašttir-dárkkisteaddji Kalevi Keskitalo muitala, ahte gielda lea diŋgon dearvvašvuođadállui viiddis sisáibmodutkamušaid.

– Sisáibmodutkamušat álget golmma vahkku geahčen. Bohtosat ádjánit jáhkkimis birrasiid guokte mánu. Jus viesus gávdno juoga, de gielda ferte smiehttat mo ovdána áššiin ja dutkat lasi, muitala Keskitalo.

Keskitalo muitala, ahte dearvvašvuođadálus leat dutkan oktii ovdal láhttemateriálaid váikkuhusa sisáibmui ja mihtidan maiddái geađgevuođu lávttasvuođa.

terveysasema hetta enontekiö heahttá eanodat
Heahtá dearvvašvuođadálus álget sisáibmomihtideamit. Govva: Anni-Saara Paltto / Yle

Kalevi Keskitalo deattuha, ahte laboratoria fárren Osuusbáŋku-vissui lea vuos gaskaboddosaš čoavddus.

– Laboratoria doaibmagoahtá viesu geažis ja áššehasat maiddái johtet laboratoriai geahčeuvssas. Vuordinlatnja ja laboratoria sirrejuvvo gaskaseinniin ja uvssain nu, ahte áššehasat eai dárbbaš johttit viesu eará doibmiid oktasaš lanjaid bokte, muitala Eanodaga huksenmeašttir-dárkkisteaddji Kalevi Keskitalo.

Divvojuvvon 11.10.2018 dii 08:30 Dearvvašvuođaguovddáš-sátni divvojuvvon dearvvašvuođadállun.

Varrasamosat: Sápmi

Váldoođđasat

Varrasamosat

Muualla Yle.fi:ssä