Sápmi

Heahtá lihkadanhálla viiddis divodeapmi gárvána jahkemolsašupmái – “Lasiha olbmuid buresveadjima”

Heahtá lihkadanhálla
Govva: Anni-Saara Paltto / Yle

Lihkadanhálla divodeapmi lea máksán Eanodaga gildii birrasiid guokte miljovnna euro.

Eanodaga Heahtá lihkadanhálla divodeapmi gárvána juovlamánu lohppii. Lihkadanhálla leat divodan ja ođasmahttán geasi rájes.

Ii leat sáhka mange unna divodeamis, go divodeami bušeahtta leamašan birrasiid guokte miljovnna euro. Lihkadanhálla divodanbargguin vástida huksenfitnodat Laplan Oy.

Divodeami oktavuođas lihkadanhállii lea dál huksejuvvon maiddái álšasále.

Heahtá lihkadanhálla lea huksejuvvon jagis 1985, nuba vuđolaš ođadeapmái lei dárbu, muitala Eanodaga gieldda teknihkalašhoavda Kimmo Lämsä.

– Dál leat ođasmahttán nu áibmomolsuma, šleađgarusttegiid, hálla liggema go vel buot seinniid ja láhtiidge. Lei stuorra dárbu beaivádit lihkadanhálla, dadjá Lämsä.

Lihkadanhálla lea divoduvvon olggobealde jagis 2014. Dalle vistái molso ođđa lásiid, olgoseinniid olggožiid ja divodedje maiddái dáhki.

Heahtá lihkadanhalla siste
Heahtá lihkadanhálla divodeapmi galggašii gárvánit jahkemolsašupmái. Govva: Anni-Saara Paltto / Yle

“Lasiha eanodatlaččaid buresbirgejumi”

Heahtá lihkadanhálla divodeapmi leamašan stuorámus investeren Eanodaga gielddas maŋemuš áiggiid. Veháš stuorát ražasteapmi lei Gilbbesjávrri máŋggadoaimmadálu huksen jagis 2017.

Eanodaga gieldda váldostivrra ságadoalli Seppo Alatörmänen oaivvilda, ahte lihkadanhálla divodemiin gielda bidjá návccaid gieldalaččaid buresveadjimii.

– Dál lihkadanhálla sáhttet geavahit buohkat, nu nuorat go vuorasolbmotge. Ovdal dat ii heiven boarrásiidda. Ođđa lihkadanhálla addá vejolašvuođaid lasihit eanodatlaččaid buresbirgejumi, oaivvilda Alatörmänen.

Eanodaga gieldda váldostivrra ságadoalli oaidná, ahte lihkadanhálla ii bálval dušše heahttálaččaid, muhto maiddái lagamuš giliid ássiid.

– Dál iežas buresbirgejumi ovdánahttin lea vejolaš buohkaide. Álšasále lea buorre lassi, go dohko besset maiddái vuorrasut olbmot rullastuoluin, deattuha Seppo Alatörmänen.

Enontekiön kunnanvaltuuston pj. Seppo Alatörmänen
Eanodaga gieldda váldostivrra ságadoalli Seppo Alatörmänen oaivvilda, ahte lihkadanhálla divodeapmi lasiha gieldalaččaid buresbirgejumi. Govva: Anni-Saara Paltto / Yle

Skuvlalaččaid buot lihkadandiimmut olgun

Lihkadanhálla leamašan eret geavahusas jahkebeali ja das leamašan váikkuhusat skuvlla lihkadandiimmuid ordnemii.

Heahtá skuvlla rektor Riitta Peltovuoma muitala, ahte sii leat šaddan sirdit buot skuvlalaččaid lihkadeami olggos, dasgo Heahtás eai gávdno sadjásaš lanjat dahje sajit sislihkadeapmái. Dattetge rektor ii leat gullan makkárge moaitagiid oahppiin dahje oahpaheaddjiin.

– Buot lea mannan bures, vaikko eat leatge beassan lihkadanhállii. Dán guovllu olbmot máhttet leat olgun, ii lihkadeapmái seinniid dárbbaš. Dušše garraseamos buollašiin lea oahpahus lágiduvvon luohkkálanjas, muitala Peltovuoma.

Heikki Tammilehto Heahtá lihkadanhálla
Heikki Tammilehto huksenfitnodat Laplan Oy:s dutká lihkadanhálla vuođđosárgosa. Govva: Anni-Saara Paltto / Yle

Rektor lea moddii fitnan geahččame, mo divodeapmi ovdána ja illuda jo dan beaivái, go ođaduvvon lihkadanhálla váldojuvvo atnui.

– Gal ođas lea álot ođas. Divodeapmi addá áibbas ođđa vejolašvuođaid maiddái oahpahussii, go skuvlalaččat besset álšasálii, dadjá Peltovuoma.

“Lihkadanhálla lea giliguovddáš”

Skuvlla lassin lihkadanhálla geavahit maiddái searvvit ja eará doaibmit. Mánáidlihkadanrieggá lágideaddji Merja Näkkäläjärvi muitala, ahte sin searvi lea šaddan hutkat olgostohkosiid, go lihkadanhálla leamašan gitta.

– Galhan mii buohkat vuordit, ahte beassat ođaduvvon lihkadanhállii, dadjá Näkkäläjärvi.

Merja Näkkäläjärvi
Merja Näkkäläjärvi áigu johtigoahtit álšasáles. Govva: Anni-Saara Paltto / Yle

Näkkäläjärvi jáhkká, ahte álšasále ja ođđa lanjat movttiidahttet olbmuid lihkadit áibbas eará láhkai.

– In leat álšasáles fitnan guhkkit áigái, muhto dál gal áiggun fas álgit. Jáhkán, ahte dat movttiidahttá maiddái dakkáriid lihkadit, geat eai leat dán rádjái beroštan nu olus das, dadjá Näkkäläjärvi.

Lihkadeami lassin Heahtá lihkadanhállas ordnejuvvojit maiddái iešguđetlágan doalut ja dáhpáhusat.

– Dathan lea veháš dego giliguovddáš, go doppe dáhpáhuvvá nu olu. Lea nu buorre, go mii oažžut ođđa fiinna sajiid, dadjá Merja Näkkäläjärvi.

Varrasamosat

Muualla Yle.fi:ssä