Sápmi |

Heargeolbmot váillahit heargegilvvuid – heargeeaiggát: "Go vel eamitge dajai, ahte váivi go eai leat heargegilvvut"

Asko Länsman lea dál geargan eambo siiddastallat, muhto vuordá goit beassat fas boahtte giđa gilvalit iežas herggiiguin.

Asko Länsman
Boazodoalli Asko Länsman lea beassan dán giđa eambo siiddastallat go eai leamaš heargegilvvut. Govva: Kaija Länsman / Yle

Dábálaččat dán muttus giđa boazodoalli Asko Länsman Njuorggámis láve leat ráhkkaneamen Anára gonagasgilvvuide, muhto dál lea jo nubbi giđđa koronaepidemiija áigge, go eai leat heargegilvvut. Dál lea áigi earáge bargguide.

– Miihan siiddastallat dál olles fártta. Mun ádden gal hui bures, ahte dán jagi eai leat dat gilvvut. In mun lean čatnange herggiid gitta go mun árvidin, mo dat boahtá geavvat dán jagi.

Länsman lei čakčat ráhkkaneamen giđđadálvve gilvvuide, muhto go fuomášii ahte koronadilli joatkášuvvá ain, de luittii herggiid siidii. Son goittot váillaha heargegilvvuid, dat leat gullan su juohke giđa doaimmaide.

– Galhan dat vehá amas lea, go eai leat gilvvut dán dálvve. Go vel eamitge dajai, ahte hui váivi go eai leat oba heargegilvvutge, bohkosa Länsman.

Guldal dás boazodoalli Asko Länsman jearahallama. Jietna: Susanna Guttorm / Yle

Heargogilvosearvvis jáhkket ain heargegilvvuid boahttevuhtii

Suomen porokilpailijat -searvvi várreságadoalli Juha Mikkolas goit lea jáhkku, ahte dilli jorggeha fas nuppeguvlui boahtte giđa ja heargegilvvut lágiduvvojit.

– Miessemánus lea vuot vejolašvuohta ohcat heargegilvvuid. Sávvamis gilvolágideaddjit eai vel leat dolkan ja ohcet boahtte jahkái heargegilvvuid.

Guldal dás Suomen porokilpailijat -searvvi várreságadoalli Juha Mikkola jearahallama. Jietna: Susanna Guttorm / Yle

Dán giđa leamaš heargegilvu Nuorittas lahka Oulu mannan vahkuloahpas. Mikkola muitala, ahte dat ledje muitogilvvut eaige eará gilvvut leat dieđus. Rátkinvuojuid leat iešguđet báikkiin doallan eandalit máttabálgosiin vai ožžot ođđa gilvoherggiid.

Mikkola leamaš viššal lágidit Anára heargegonagasgilvvuid ja dadjá, ahte orru ártet vuodjit gilvobáikki meattá dál.

– Vilppastan dohko jieŋa guvlui ja dábálaččat lean doppe livžumin olles fártta, muhto dánge jagi eai gilvvut šaddan, smiehtada son.

Anára heargegonagasgilvvuid jođiheaddji Juha Mikkola.
Suomen porokilpailijat -searvvi várreságadoalli Juha Mikkola váillaha heargegilvvuid. Dál lea jo nubbi giđđa go ii leat beassan johtit gilvvuin. Govva: Kirsti Länsman / Yle

Mikkola váillaha heargegilvvuid ja muitala, ahte dan dihte son movttáskii mannan vahkuloahpas finadit Nuoritta gilvvuin vai beassá joba oktiige návddašit gilvodovddus.

Maiddái Asko Länsman lea vuorddašeamen jo boahtte giđa.

– Gal mun jáhkán, go dál daid boahkuhusaid olbmot fidnejit, ammal jo jagi geahčen jo beassat. Muhto hearrá dan diehtá. Iihan dan lean jáhkkit ahte ná guhká duođaid bistá muhto nu leat fal bistán.

Varrasamosat: Sápmi

Váldoođđasat

Varrasamosat

Muualla Yle.fi:ssä