Sápmi

Heargevuoddjiid ja -eaiggádiid hohppos áiggit álget fas – gilvvuin johtet mánát maid

Porokisakuski Uula-Petteri Somby valmistautumassa ensimmäiseen lähtöön porokisoissa.
Govva: Vesa Toppari / Yle

Heargegilvvut čohkkejit badjeolbmuid miehtá Suoma. Heargegilvvuid boahttevuohta orru buorre, go ođđa buolva beassá maid vuodjit.

Dál lea fas áigi čielggadit, gean heargi lea falimus ruohttat olles Suomas. Suoma heargecup álgá lávvardaga Roavvenjárggas.

Heargecupii gullet njeallje oassegilvvu, main buoremusat birgen hearggit besset gilvalit heargegonagasvuođas Anáris, njukčamánu maŋimuš vahkoloahpa.

Gámasmohkelaš Báišduoddara badjeolmmoš Uula-Petteri Somby vuordá giđa gilvvuid iluin. Son lea gilvalan juo badjel 16 jagi.

– Giđđa lea dakkár áigi ahte fiellada gilvvuide. Sáhttá lohkat, ahte dat lea juo varas, dadjá Somby.

Vaikka voittoja sataa, silti lopettaminen on käynyt Uula-Petteri Sombyn mielessä.
Uula-Petteri Somby mannán jagi heargecup oassegilvvus Luostos. Govva: Vesa Toppari / Yle

Uula-Petteri Sombys leat alddis njeallje hearggi mielde, muhto gilvvuin soitet oidnostit maid eamboge su hearggit eará vuoddjiin. Mielde lea maid juo guhká gilvalan Ražán.

– Mus leat nuorra lohpádusat, in dieđe boares heargái luohttit, oaidná mo de manná.

Maiddái anárlaš Muttošjávrre bálgosa badjeolmmoš Marko Tervaniemi illuda ođđa gilvobadjái. Tervaniemi lea hárjánan vuoddji, ja vujiige diimmá heargegonagasa, Annin Suivakko. Tervaniemi joavkku mielde johtet ovcci hearggi. Herggiid oamasteaddjit leaba Leo Aikio Muttošjávrri bálgosis ja Juha Mikkola Avvila bálgosis.

Tervaniemi luohttá iežas joavkku herggiide.

– Lean vuodján juo nu guhká, ahte oainnán bohccos dalán vuosttas geardde, ahte mo dainna manná. Gal dan oaidná makkár ovttasbargu herggiin šaddá, muitala Marko Tervaniemi.

Heargegilvvut
Heargevuoddji ferte atnit fuola gorudis. Govva: Vesa Toppari / Yle

Uula-Petteri Somby vuodjá iežas herggiid lassin muhtin eará herggiid maid. Vuoddji juolge- ja bahtadeahkit galget leat nana ortnegis. Somby jáhkká iežas vuodjinsearaid leat buorit.

– Ledjen galgat čuoigat, in leat šaddan dál gal oba stártage váldit. Somá oaidnit, mo mun nagodan. Dieđusge go lea nu guhká vuodján, de gal dat manná, muhto juolggit vehá ballet.

Marko Tervaniemi
Marko Tervaniemi vuolgá heargegilvvuide mánáidisguin. Govva: Xia Torikka / Yle

Marko Tervaniemi lea hárjehan herggiid lassin maid iežas vai lea buriin álššain, go gilvvut álget.

– Mii leat hárjehallan muhtin veardde ovttas min joavkkuin. Lean maiddái čuoigan ja viehkan. Juha ja Leo leaba hárjehan juo guhká daid herggiid ja leat vuodjánge máŋgii.

Mánát mielde gilvvuide – "Várrahan mun beasan heaitit"

Suoma heargecupas besset maid 8–13-jahkásaš mánát geahččalit vuodjima ja gilvaleami junior race -luohkás.

Uula-Petteri Somby gándii, 11-jahkásaš Heikki-Matias Sombyi lea dál nubbi jahki, go beassá vuodjit. Áhči mielas lea somá, go beassá mánáiguin vuolgit gilvvuide.

– Dies dat álgá, njealji jagi geažes beassá vuodjit senior-luohkkái. Livčče oalle issoras, jus dál juo livčče doppe. Dan luohkás leat stuora hearggit ja báhkka luohká hearggit eai bala vuoddjis, dathan ruhttet badjel.

– Várrahan mun de beasan heaitit, nu mun sávan. Álgit de hárjehit gándda ja herggiid, lohká Uula-Petteri Somby.

Heikki jatkaa isänsä suksenjälijllä.
Heikki-Matias Somby lea čuvvon áhčis heargegilvomáilbmái. Govva: Vesa Toppari / Yle

Marko Tervaniemi nieiddaš Ruut Tervaniemi sihke gándda guovttos Pekka ja Elias Tervaniemi áigot vuodjit dán jagi heargecuppiin.

– Sii leat vuodján ovdalge. Mu jumežat eaba vel áibba beasa vuodjit, ii mana guhká gal, muitala Tervaniemi.

Roavvenjárgga oassegilvvu listtuid oainnat dás.

Yle Sápmi čuovvu Tervaniemi bearraša gilvomátkki Roavvenjárgii dán vahkoloahpa. Áššis eanet boahtte vahku álggus.

Varrasamosat

Muualla Yle.fi:ssä