Sápmi |

Heađuštitgo stáhtaráját ovttasbarggu? Sámi rádjahehttehuslávdegoddi bivdá olbmuid muitalit vásáhusaideaset

Lávdegoddi háliida diehtit riikkarájáid dagahan hástalusaid birra vai sáhttá evttohit doaibmabijuid dili buorideapmái.

Sámi rádjahehttehuslávdegoddi
Sámi rádjahehttehuslávdegotti lahtut leat Anders Kråik (gur.), Runar Myrnes Balto ja Ulla Magga. Govva: Åse M.P. Pulk / Sámediggi

Olbmuid sávvet muitalit vásáhusaideaset das, mo stáhtaráját leat dagahan hástalusaid ja váttisvuođaid sápmelaččaid eallimii ja ovttasbargui riikkarájáid rastá.

Vásáhusaid čohkke Sámi rádjahehttehuslávdegoddi, man Sámi Parlamentáralaš Ráđđi lea diibmá nammadan. Lávdegotti jođiha Runar Myrnes Balto Norgga bealde. Eará lahtut leaba Anders Kråik Ruoŧa bealde ja Ulla Magga Suoma bealde.

Lávdegotti bargun lea čielggadit, mo riikkaráját váttásmahttet sápmelaččaid ovttasbarggu ja gulahallama, ja makkár hástalusaid dat buktet olbmuide, bearrašiidda, organisašuvnnaide, ásahusaide dahje ealáhusaide.

– Lávdegoddi vuolgá dan jurdagis, ahte ferte šaddat álkit leat sápmelaš ja gulahallat sápmelaččaiguin eará riikkain. Miihan leat okta álbmot. Lávdegotti ulbmil lea geahččat, mii hehtte min eallima oktan álbmogin, čilge Runar Myrnes Balto.

Sámi rádjahehttehuslávdegoddi evttoha čohkkejuvvon vásáhusaid vuođul doaimmaid, maiguin dili sáhttá buoridit.

Mo lea ássat guovtti riikkas, naba johtit nuppi riikkas barggus?

Vásáhusat sáhttet guoskat ovdamearkka dihte barggus johtima, guovtti riikkas ássama, vuođđoskuvlaovttasbarggu, sámi alit oahpuid ja studeantaeallima, dearvvašvuođafálaldagaid, duoji vuovdima nuppi beallái rájá, kulturbargguid, prošeavttaid ja boazodoalu rádjaguovlluin. Lávdegoddi ii goittot áiggo árvvoštallat guohtunášši.

Lávdegotti jođiheaddji Runar Myrnes Balto namuha ovdamearkan earret eará daid hástalusaid, maid duojárat leat vásihan, go leat áigon fitnat eará riikkain márkanastimin ja vuovdimin dujiideaset.

– Mii diehtit doppe leat vearrohástalusat, go galgá riikkarájá rasttildit. Mii diehtit, ahte jus sápmelaš ovdamearkka dihte orru Suoma bealde ja bargá Norgga bealde, de sáhttet maiddái leat hástalusat vearromáksimis, dearvvašvuođafálaldagain ja nu ain.

Vásáhusaid bivdet sáddet Sámi rádjahehttehuslávdegoddái e-poastta bokte ovdal cuoŋománu 15. beaivvi čujuhussii samediggi(at)samediggi.no.

– Dan maŋŋá álgit bargat bohtosiiguin, ja de sávvamis čavčča bealde mii geargat dáinna bargguin, dadjá Myrnes Balto.

Varrasamosat: Sápmi

Váldoođđasat

Varrasamosat

Muualla Yle.fi:ssä