Sápmi |

Helandera Eatnanvuloš lottit -filbma USA stuorimus indie-festivála oanehisfilbmagilvvus – "Dát rahpá uvssaid"

Sundance lea okta USA stuorimus ja eanemus mearkkašahtti filbmafestiválain. Festiválii mielde beasai vuollel proseantta ohcan oanehisfilmmain.

Eatnanvuloš lottit – Maan sisällä linnut.
Birit ja Katja Haarla dánsuba Eatnanvuloš lottit -filmmas Sámi gilážiid ja mehciid čađa gitta Helssegii. Govva: Marja Helander / Eatnanvuloš lottit – Maan sisällä linnut

Marja Helandera oanehisfilbma "Eatnanvuloš lottit" lea válljejuvvon virggálaš oanehisfilbmagilvui Sundance-filbmafestiválas USA:s.

Sundance lea okta USA stuorimus ja eanemus mearkkašahtti filbmafestiválain. Helander lohká dan rahpat uvssaid.

– Mun lean hui ilus ja duđavaš dieđusge. Dáthan lea stuorra dovddastus, ii dušše munnje muhto olles bargojovkui. Mun doaivvun, ahte festivála rahpá uvssaid buot olbmuide, geat leat bargan dán filmma bargojoavkkus, muitala Helander.

Filbmafestiválas čájehit indie-filmmaid, nappo filmmaid mat eai leat stuorra fitnodagaid dahje studioid buktagat. Helandera mielas lea álot buorre, go sámefilmmat besset stuorra máilbmái.

– Dat lea álot fiinna ášši ja dat rahpá geainnu maiddai boahttevuođas, ja beassá maiddái muitalit sámiin, sápmelašvuođas ja sámiid čuolmmain, mat leat váldoservodaga čárvestagas, lohká Helander.

Marja Helander, Helsinki, 29.11.2018
Árat Marja Helandera bagadallan filbma Eatnanvuloš lottit lea Bálkkašuvvon ImagineNATIVE – álgoálbmotfilbmafestiválas Torontos ja lea maid ožžon Risto Jarva- bálkkašumi Tampere oanehisfilbmafestiválas. Govva: Antti Haanpää / Yle

"Sundance lea okta deháleamos bihtáin dan bihttáspealus, mii filbmasuorggis lea"

Sundance ordnejuvvo ođđajagimánus Park Citys, Utah-oassestáhtas USA:s. Helander ieš ja goit guokte eará bargojoavkku lahtu meidnejit dollet festiválii.

– Suoma filbmavuođđudus (su. Suomen elokuvasäätiö) lea dadjan, ahte mii oažžut veahkkeruđa, mainna vuolgit dohko.

VOX.com mielde Sundance lea eanemus árvvus adnon filbmafestivála USA:s ja okta deháleamos bihtáin dan bihttáspealus, mii filbmasuorggis lea. Sundance addá uhcit produkšuvnna filmmaide publikumma ja maiddai iešguđet rávdnjenbálvalusaid dego Netflix, Amazon dahje HBO Go ovddasteaddjit oassálastet festiválii. VOX.com mielde Netflixas ja Amazon Studios leat leamašan "čiekŋalis lummat", nappo dat leat háhkan olu filmmaid sin bálvalussii Sundances.

Festiválii ii goittotge leat álki oažžut iežas filmma mielde. Jahkásaččat válljejit sullii 200 filmma, maid čájehit festiválas. Jagi 2018 festiválii ohce 13 468 filmma oktiibuot badjel 190 riikkas, nappo vuollel 1,5 proseantta dain filmmain mat ledje ohcan, besse mielde festiválii. Dál Sundancei ohce 9 443 oanehisfilmma main 73 besse mielde festiválii nappo vuollel proseantta váldojuvvui mielde festiválii. Marja Helandera filbma lea okta dain.

– Mii ozaime Suomas AV-arkki videodáidaga lebbenfitnodaga bokte, muitala Helander.

Jagis 2017 festivála dahke ođđa gálledeaddjiolahusa go festiválas gallededje sullii 71 600 olbmo. Jagis 2018 festiválas fas ledje 124 900 gálledeaddji, nappo festivála juvssai ođđa gálledeaddjiolahusa.

Eatnanvuloš lottit – Maan sisällä linnut.
Govva: Marja Helander / Eatnanvuloš lottit – Maan sisällä linnut

"Sámefilmmaide lea vuostáiváldi publihkka Davvi-Amerihkás"

Eatnanvuloš lottit -filbma muitala sápmelaš dánsastudeanttaid Birit Haarla ja Katja Haarla birra. Birit ja Katja Haarla dánsuba filmmas Sámi gilážiid ja mehciid čađa gitta Helssegii. Duodji dutká sámeguovlluid oamasteami duohken váikkuheaddji stuorát gažaldagaid.

Filbma lea árat bálkkašuvvon ImagineNATIVE-álgoálbmotfilbmafestiválas Torontos ja lea maid ožžon Risto Jarva- bálkkašumi Tampere oanehisfilbmafestiválas.

Suopmelaš mediadáiddaguovddáš AV-arkki prográmmakoordináhtor Tytti Rantanen lohká, ahte eamiálbmotfilmmain lea dál nana sajádat Davvi-Amerihká filbmafestiválagiettis.

– Davvi-Amerihkás lea sámefilmmaide vuostáiváldi publihkka, muhto Helandera duodji orru geasuheame maiddai dán ráddjejuvvon publihka badjel, muitala Rantanen.

Jagis 2017 suopmelaš oanehisfilbma lei mielde Sundance virggálaš gilvooasis. Filbma lei filbmafitnodat Komeetta buvttadan ja Teemu Niukkanena bagadan filbma "Saatanan kanit".

Divvojuvvon 4.12.2018 dii: 15:12: Jagis 2017 filbma "Saatanan kanit" lei mielde Sundance oanehisfilbmagilvvus. Ovdal muitaleimme ahte jagis 2013 lea suopmelaš oanehisfilbma maŋimus leamaš mielde Sundance virggálaš gilvooasis. Filbma lei Jenni Toivoniemi oanehisfilbma "Treffit".

Dárkkálmahttojuvvon 4.12.2018 dii: 09:47: Festivála lea dahkan gálledeaddjiolahusaid guokte jagi maŋŋálaga. Ovdal muitaleimme dušše jagi 2017 gálledeaddjiolahusas.

Varrasamosat: Sápmi

Váldoođđasat

Varrasamosat