Sápmi |

Helene Schjerfbeck klassihkar boahtá vuossárgga Siidii – Anna Morottaja juoigá távvala

Anáris ii leat goassige ovdal leamašan vejolašvuohta oahpásnuvvat ná stuora dáiddabihttái. Veaddjájeaddji-dáiddabihttá lea oaidninláhkai Siiddas borgemánu 27. beaivvi rádjai.

Helene Schjerfbeckin maalaus Toipilas
Helene Schjerfbeckin maalaus Toipilas vuodelta 1888. Govva: Petra Ristola / Yle

Helene Schjerfbecka dovddus klassihkar "Veaddjájeaddji" (su. Toipilas) buktojuvvo otne vuossárgga sámemusea Siidii Anárii.

Helene Schjerfbeck (1862–1946) lei juo eallimis áigge okta Suoma njunuš govvadáiddáriin. Veaddjájeaddji lea málejuvvon Eŋglándda Cornwall guovllus St. Ivesin gilis.

Gova mállen lei ealás, sullii guđajahkásaš nieiddaš. Duskkástuvvan oahpaheaddji attii mielas nieiddažii lobi leat dáiddárii mállen. Dan jagi go njuohtan šattai gárvvisin, dat lei ovdan Pariisas Saloŋgga-čájáhusas namain "Première verdure", runiideapmi.  Seamma jagi, jagis 1888, njuohtan osttojuvvui Ateneuma čoakkáldagaide.

"Duođai mearkkašahtti ášši"

Sámemusea Siida illuda das, ahte sii ožžot ná mearkkašahtti dáiddabihtáid Sápmái.

– Lea duođai mearkkašahtti, ahte Veaddjájeaddji galleda Sámemusea Siiddas, dákkár klassihkkarii ii leat ovdal leamaš Anáris vejolašvuohta oahpásnuvvat, muitalit Siiddas.

Čájáhus rahppojuvvo otne vuossárgga diibmu 17 Siidda auditoriijas. Báikki alde lea maiddái Álbmotgalleriija konserváhtor Kirsti Hiltunen muitaleamen eanet dáiddabihtás.

Dáiddabihttá oažžu iežas luođi

Anna Morottaja
Govva: Vesa Toppari / Yle
Helene Schjerfbeck dáiddabihttá oažžu maiddái iežas luođi. Anárlaš juoigi ja livđejeaddji Anna Morottaja lea ráhkadan Veaddjájeaddjái luođi, man son ovdanbuktá vuossárgga rahpandoaluin Siiddas.

Veaddjájeaddji lea oaidninláhkai Siiddas gitta borgemánu 27. beaivái.

Varrasamosat: Sápmi

Váldoođđasat

Varrasamosat

Muualla Yle.fi:ssä