Sápmi |

Helsingin Sanomat čielggadii EU-válgaevttohasaid rihkusduogážiid – Mikkel Näkkäläjärvi gáhtá nuorravuođa feaillaidis

Sosiálademokráhtaid ságajođiheaddji Antti Rinne ii loga diehtán evttohasa duogážiin ja son sávvá ahte Näkkäläjärvi lea ádden dili ja oahppan das.

Mikkel Näkkäläjärvi.
Demarinuoraid ságadoalli, EU-válgaevttohas Mikkel Näkkäläjärvi. Govva: Vesa Toppari / Yle

HS almmuhii sotnabeaivve čállosa man várás doaimmahus lea čielggadan euroválgaevttohasaid rihkusduogáža.

Helsingin Sanomat čállosa vuođđun leat Suoma gearretrivttiid dahkan áššáskuhttimat áigodagas 2004-2019. Euroválggas leat 269 evttohasa ja sis 33 leat dán áigodagas sivahuvvon mannu rihkkosis. Dat lea 12 proseantta evttohasain.

Veardádallama dihte seamma áigodagas sullii 15 proseantta Suoma álbmogis leat sivahuvvon mannu rihkkosis. Seammalágan čielggadeami HS dagai maiddái riikkabeaievttohasain árat dán giđa.

Lágafámu ožžon duopmu lea mearriduvvon ovcci evttohassii. Sis njealjis leat vuođđosuopmelaččat ja okta evttohas guovddášbellodagas, olgešbellodagas, kristtalašdemokráhtain ja sosiálademokráhtain.

Evttohas válljii muitalit ieš

Seamma beaivvi go HS almmuhii ođđasis de čálii evttohas Mikkel Näkkäläjärvi Facebook-siidduinis, ahte son lea dat sosiálademokráhtaid evttohas guhte lea dubmehallan gearretrievttis. Son muitalii almmolaččat iežas duomuin jagiin 2006 ja 2010.

– Šállošan ja gáđan daguidan dásge ovddosguvlui, loahpaha Mikkel Näkkäläjärvi fb-čállosis.

Dán maŋŋá HS čálii Mikkel Näkkäläjärvi ráŋggáštusain dainna ákkain, ahte evttohas ieš lei čállán nuorravuođa dáhpáhusain almmolaččat.

Vuosttas duopmu mearriduvvui earret earáid ealliidsuodjalanrihkkosis man dihte son sáhkohalai 16-jahkásažžan. Maŋit duopmu mearriduvvui gárrenvuodjimis ja das čuvvo sáhkut ja evttolaš fáŋgavuohta 20-jahkásažžan.

Helsingin Sanomat čilgii čállosisttis dárkilabbot dan mii gearretrievtti duomus celkojuvvo ja jearai maiddái euroválgaevttohasas alddes dan mo son muitá dáhpáhusaid.

Vuossárgga sosiálademokráhtalaš bellodaga ságajođiheaddji Antti Rinne dajai STT ođđasis, ahte bellodagas ii lean diehtu euroválgaevttohas Mikkel Näkkäläjärvi rihkushistorjjás.

– Sávan ahte almmái lea ádden dili ja oahppan das. Son lea ráŋggáštusaid gillán, dadjá Antti Rinne.

Varrasamosat: Sápmi

Váldoođđasat

Varrasamosat

Muualla Yle.fi:ssä