Sápmi |

Helssegis álget Saamenmaa 2020 -temávahkut – hálidit fállat gávpotolbmuide vejolašvuođa návddašit ja oahppat sámekultuvrras

Temávahkut sisttisdollet máŋggalágan prográmma, earret eará njoarostanoahpu mánáide.

Sami Lehto
Temávahkuid koordinerejeaddji Sami Lehto lea nuorravuođa rájes johtán Sámis. Sámevuođas lea dan dihte šaddan sutnje váimmu ášši. Govva: Juha Länsman

Suoma oaivegávpogis Helssegis álget vuossárgga 20.1. sámekultuvrra temávahkut. Dáhpáhusa namma lea Saamenmaa 2020.

Dát lea nubbi geardi, go dáhpáhus ordnejuvvo Helssegis. Vuosttas temávahkut ledje jagis 2016.

Dáhpáhusa "áhčči" lea helssetlaš nuoraidbargi Sami Lehto. Son lea nuorravuođas rájes johtán Sámis, ja dan bokte sámevuohta lea šaddan sutnje váimmu áššin. Son lea ordnen temávahkuid ovttas Nuortalaškulturfoandda áššeolmmoš Mari Korpimäkiin.

Jurdda dáhpáhusas riegádii njeallje jagi dassái, go Lehto ja Korpimäki jurdileigga ovttas, ahte Helssegis sáhtášii ordnet makkárnu prográmma sámekultuvrra birra. Ulbmilin lea, ahte iešguđetlágan dáhpáhusaid bokte helssetlaččat besset návddašit ja seammás oahppat sámekultuvrras.

– Jurddan lea, ahte mii buktit sámeguovllu, sápmelašvuođa ja sámekultuvrra dovddusin helssetlaš mánáide ja nuoraide, muhto maiddái rávesolbmuide. Buoremus vuohki dasa lea, ahte sápmelaččat bohtet ieža muitalit ja čájehit, muitala Sami Lehto.

Barggustis nuoraiguin son lea fuobmán, ahte dákkár dáhpáhusaide lea dárbu.

– Lean bargan Helssegis 30 jagi nuoraidbargin ja lean fuobmán, man unnán diehtu dáppe lea sámiid birra. Go barggustan lea vejolašvuohta váikkuhit dan áššái, de dieđusge dan dagan, Lehto joatká.

Bargobájit, konsearttat ja čájáhusat

Saamenmaa 2020 -temávahkut álget vuossárgga 20.1. rahpandilálašvuođain, mii lea Haagan Lämpiös. Vahkut joatkašuvvet gitta 14.2. rádjai. Eará dáhpáhusat ordnejuvvojit earret eará Haagan lämpiös ja Pohjois-Haaga girjerádjosis.

Prográmmii gullet earret eará golbma čájáhusa, konseartaráidu ja iešguđetlágán dáhpáhusat dego bargobájit njoarosteamis ja musihkas. Maiddái Sámi musihkkaakademiija mátkkošta oaivegávpogii konserteret.

Prográmmii beassá oahpásmuvvat temávahkuid Facebook-siidduin.

Temávahkuin leat mielde máŋggat ovttasbargodoaibmit, earret eará stuorra Pohjois-Haaga skuvla, gos leat 900 oahppi.

Varrasamosat: Sápmi

Váldoođđasat

Varrasamosat

Muualla Yle.fi:ssä