Sápmi |

Highland Games buvttii skotlándalaš gievrrastallama Eanodahkii

Saana Hillrace Highland Games -dáhpáhus buvttii skotlándalaš gievrrastallama Eanodahkii. Garraseamos gilvu lei viehkat Saana duoddara ala.

saana hillrace highland games hetta
Saana Hillrace Highland Games-dáhpáhusa bokte eanodatlaččat besse oahpásmuvvat skotlándalaš givrodatšlájade. Govva: Yle / Minna Näkkäläjärvi

Skotlándalaš badjeeatnamiid givrodatgilvošlájat šadde mannan vahkus oahpisin eanodatlaččaide. Suoma Givrodatšlájaidlihttu-Suomen Voimalajiliitto ordnii Saana Hillrace Highland Games -dáhpáhusaid sihke Heahtás ja Gilbbesjávrris.

Heahtás olbmot besse oaidnit go Suoma Highland Games meašttirat gilvaledje kiltti-čuvllat badjelis deaddokubihkabálkesteamis, náđđašluppoha šlivgemis ja hirssa hoigamis. Lea vuosttaš geardi go dákkáraš Highland gilvvuid ordnejit ná davvin. Suoma Givrodatšlájaidlihttu ságadoalli Jyrki Rantanen muitala, ahte lei lunddolaš buktit skotlándalaš gilvvuid Eanodahkii.

– Dáppe Eanodagashan leat Suoma alimus duoddarat, de dathan leatge dego Skotlándda badjeeatnamat- Highlands. Nu mis šattaige jurdda ordnet skohttalaš fámostallangilvvuid dáppe. Gilbbesjávrris Saana duoddara bajás viehkan fas lea dego gonagaslaš várreviehkan Skotlánddas, muitala Jyrki Rantanen.

Saana
Saana duoddara ala dolvot 740 tráhppa. Govva: Yle / Minna Näkkäläjärvi

Suoma guhkimus tráhpaid bajás

Saana Hillrace Highland Games garraseamos gilvu lei viehkat Saana duoddara ala. Viehkangilvu ii goittotge geasuhan beare máŋgasiid. Dušše guđas gilvaledje das, gii lea falimus goargŋut bajás Suoma guhkimus tráhpaid. Suoma Hihgland Games meašttiriin gilvui ii oasálastán go okta, Kaisa Leppänen-Gomes, muhto su mátki bajás lei losit go eará gilvaleaddjiin. Kiltti-čuvla luohkás Kaisa Leppänen-Gomes šattai guoddit vel logi gilo liikedeattu duottar alážii ja dat buvttii hástalusaid njealji kilomehtera mátkái.

Kaisa Leppänen-Gomes
Kaisa Leppänen-Gomes guttii sealggistis 10 kg liigedeattu. Govva: Yle / Minna Näkkäläjärvi

– Gal gánnihii vuolgit, lei hui fiinna vásáhus ollet bajás. Muhto gal dat fal oba lossat lei logi gilo liigedeattuin mannat nu ceakko vári bajás. Váibmu gal cohkii várra 180 olles mátki, ii dat gal luoitán, go olles áigge fertii goargŋut dan 4 kilomehtera mátki bajás, muitala Kaisa Leppänen-Gomes.

Boahtte jahkái livččii ulbmilin, ahte Saana Hillrace Highland Games -gilvvuide boađáše oasálastit maiddái Norggas ja Ruoŧas.

– Dán jagi Norgga ja Ruoŧa Highland Games -meašttirat eai beassan boahtit Eanodahkii, muhto boahtte jagi gal de leat fas gilvvut jođus ja sávvamis leat olu eanet oasálastit ja mii beassat gilvalit Ruoŧa ja Norgga vuostá, dadjá Suoma Givrodatšlájaidlihttu ságadoalli Jyrki Rantanen.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä