Sápmi |

Historjjálaš stuorra dálkkádatvázzin Helssegis – “Dát lea dego festivála”

Lávvardat veaigin Helssegis lágiduvvui dálkkádatvázzin, Ilmastomarssi, mii čohkkii miellačájeheddjjiid duháhiid mielde. Ná stuorra dálkkádatproteasta ii leat ovdal lágiduvvon Suomas. Proteastta ulbmilin lea gáibidit riikkabeivviid čatnasit doaimmaide, mainna bissehit dálkkádatliegganeame 1,5 cehkkii.

Dálkkádatvázzin.
Petra Laiti, Anne Olli ja Ida-Maria Helander dálkadatvázzimis. Helander logai báikki alde leamašan jalla olu olbmot. Govva: Helga West / Yle

Olbmot ledje buriid áiggid čoahkkanan Helssega guovddážii, Senáhttatorgii, gos dálkkádatvázzin vulggii johtui. Helssega poles lei ráhkanan 5 000 olbmo čoahkkaneapmái ja beaivvi áigge Helsset poles árvvoštalai, ahte sullii 8 000 olbmo ledje searvan vázzinráidui. Helssega guovddáš, Aleksantergáhtta ja Mannerheimagáhtta dievaigga vázziin. Olmmošjoavku váccii gávpoga čađa gitta riikkabeaidálu ovdii.

“Goassige ovdal historjjás ii leat addon mikrofona sápmelažžii ná stuorra olmmošjoavku ovddas”

Suoma Sámi Nuorat -searvi lei oktan lágideaddjin ja ságajođiheaddji Petra Laiti lei vázzima njunušolmmoš. Son váccii ovddemuččas ráiddus, huikkahii olbmuid ja doalai sáhkavuoru riikkabeaidálu ovddas. Dálkkádatvázzima lágideaddjit ledje sávvan, ahte miellačájeheaddjit ieža eai čájet bellodatdovddáldagaid.

Dálkkádatvázzin.
Petra Laiti logai sáhkavuorustis ahte ii áiggo seastit sániidis sáhkavuorus. Govva: Helga West / Yle

Riikkabeaidálu ovdii ledje iešguđet ráđđehusbellodagain boahtán Matti Vanhanen, Kai Mykkänen, Antti Rinne, Sampo Terho, Maria Ohisalo, Hanna Sarkkinen, Anders Adlercreutz ja Tiina Tuomela. Laiti čujuhii iežas sáhkavuorustis njunušpolitihkkáriidda, geat ledje boahtán iežaset bellodagaid ovddastit ja vástidit dasa, maid sin bellodagat áigot bargat dálkkádatliegganeame bisseheame ovdii.

– In jáhke, ahte goassige ovdal historjjás dán riikas lea addon mikrofona sápmelažžii ná stuorra olmmošjoavku ovddas, nu ahte dál gal in álgge seastit sániidan, álggahii Laiti sáhkavuorustis.

Dálkkádatvázzin.
Riikabeaiáirasat iešguđet ráđđehusbellodagain ledje boahtán báikki ala. Govva: Helga West / Yle

Njunušpolitihkkárat adde lohpádusaid

Čieža minohtasaš sáhkavuorustis Laiti čalmmustahtii birasáššiid, mat leat čuohcan sámiide, dego vuovddi čuollamiid, Deanu guolástanrivttiid viiddideame turisttaide, muhto báikkálaččain dain gáržžideame sihke Jiekŋameara ruovdemáđiija váikkuhusaid boazodollui.

Suoma Sáme Nuoraid -searvvi várreságájođiheaddji Ida-Maria Helander dollii togas riikkabeaidállui justa ovdal Laiti sáhkavuoru, man navddii fámolažžan.

– Dáppe leat jalla olu olbmot, ii dan oba ádde. Go oidnen ráiddu seaibbi, de orui gávpot dego festivála, logai Ida-Maria Helander.

Politihkkárat navde miellačájáhusa stuorámus dálkkádatproteastan Suomas ja adde juohkehaš iežas bellodaga lohpádusa das, goas sin bellodagat celket eret vuvddiid čuollamiin, fossiila boaldámušain, fossiila boaldámušaid fitnodatdoarjagiin ja ođđa lavdnjegittiid ceggemiin. Buohkat oaivvildedje, ahte lágaid galggašii čavget, muhto gaskaneaset sis ledje sierraoaivilat das, man johtilit Suoma ráđđehus sáhttá cealkit iežas eret soahpamušain ja lágain, mat eai doarjjo dálkkádatliegganeame bisseheame.

Proteasttas ledje máŋggat lágideaddjit, dego Greenpeace, Helssega universitehta studeantagoddi, Suoma luonddusuodjalanlihttu, WWF Suopma ja Suoma Sámi Nuorat -searvi. Vázzinráidu vulggii johtui golmma sulain ja dáhpáhus nogai beal guđa áigge eahkedis riikkabeaidálu ovddas. Helssega polesa mielde miellačájáhus manai ráfálaččat.

Dálkkádatvázzin.
Govva: Helga West / Yle

22.10.2018 diibmu 08.09: Divvojuvvon diehtu ahte Petra Laiti logai, ahte son ii jáhke goassige ovdal historjjás dán riikas lea addon mikrofona sápmelažžii ná stuorra olmmošjoavku ovddas. Ovdal lei ahte goassige ovdal historjjás lea addon mikrofona sápmelažžii ná stuorra olmmošjoavku ovddas.

Varrasamosat: Sápmi

Váldoođđasat

Varrasamosat