Sápmi |

Holmberg galledii Ovttastuvvon gonagosgotti parlameantta – válddii ovdán Sámi riekteságastallama

Niillas Holmberg doalvvui sáni sámiid rivttiid birra Ovttastuvvon gonagasgotti parlamentii.

Catherine West ja Niillas Holmberg Ovttasduvvon gonagasgotti parlamenttas.
Cathrine West ja Niillas Holmberg Ovttasduvvon gonagasgotti parlamenttas. Govva: Niilllas Holmberg / priváhta

Ohcejohkalaš dáiddár ja aktivista Niillas Holmberg doalvvui mannan vahkus Sámi riekteságastallama Ovttastuvvon gonagasgotti nappo Stuorra Britannia ja Davvi-Irlándda parlamentii, go parlameantta lahttu Catherine West lei bovden su muitalit sámiid dili birra.

– Ságastalaime earret eará Deanu soahpamuša ja Suoma guolástanlága birra, mat leat áigeguovdilis ovdamearkkat min olmmošvuoigatvuođaid rihkkumis, lohká Holmberg.

Catherine West lea bargiidbellodaga, The Labour Party, lahttu, gean earenoamáš suorgin lea riikkaidgaskasaš olmmošvuoigatvuođat. Holmberg mielas riikkaidgaskasaš fuopmášupmi sáhtašii leat ávkin Sámi áššiide.

– Min jietna ii gullo dain riikkain, mat oamastallet Sámi ja vigget jienajávohaga rievidit min rivttiid. Mu jáhkán, ahte riikkaidgaskasaš fuopmášupmi sáhtášii deaddit stáhtaid várrugasvuhtii.

Holmberg lea duđavaš ságastallamii Cathrine Westain.

– Dál go Ovttastuvvon gonagasgotti BREXIT:a maŋŋá geahčada ođđasit gaskavuođaidis eará riikkaide, de lea liiba jearrat gažaldagaid. Catherine West lohpidii váldit min ášši ovdan parlameanttas ja erenoamážit olgoriikkaid ministariin Boris Johnsoniin.

Holmberg gullá Ellos Deatnu lihkadussii, mii bargan ovddidit sámiid iešmearrideami Deanus.

Beaiváduvvon 12.9.2017 dii 10.12 ja 12.59: Nuppástuhtton Stuorra Britannia hápmái Ovttastuvvon gonagosgoddi ja lasihuvvon  čilgehus, ahte Ovttastuvvon gonagasgoddái gullet Stuorra Britannia ja Davvi-Irlánda.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä