Sápmi |

Holmberg ja Gauriloff čálliba ovttas ođđa ealligova – Je’vida, okta nuortalaš nisu ja su eallin

Vuosttas veršuvdna ealligova giehtačállosis gárvvásmuvai giđđat, ja dál Suoma ealligovvaruhtaráju doarjagiin soai joatkiba giehtačállosa ovddideami.

Niilas Holmberg ja Katja Gauriloff
Dáiddár Niillas Holmberg ja filbmadahkki Katja Gauriloff leaba čállimin vuosttas oktasaš ealligova. Govva: Jari Kovalanen / Yle, Terhi Liimu / Yle

Dáiddár Niillas Holmberg ja filbmadahkki Katja Gauriloff leaba ožžon 6800 euro doarjaga ovddidit giehtačállosa ealligovvii nuortalaš nissonis. Doarjaga mieđihii Suoma ealligovvaruhtarádju.

Gauriloff ja Holmberg boahttevaš, guhkes fikšuvdnafilmmas ulbmilin lea čuovvut Je’vida-nammasaš nuortalaš nissonolbmo eallima áiggiid čađa. "Je’vida" lea maid filmma namma. Vuosttas veršuvdna giehtačállosis gárvvásmuvai giđđat, ja dál Suoma ealligovvaruhtaráju doarjagiin soai joatkiba giehtačállosa ovddideami.

Filmmas nissona eallin álgá 40-logus ja joatkašuvvá dán beaivvi rádjái, muitala dáiddár Niillas Holmberg.

– Filbma muitala ovtta nuortalaš nissonolbmo eallimis golmma sierra áiggis. Das bohtet ovdan áiggiid rievdamat. Midjiide buohkaide lea mannu dásis oahpis, mo stuorra máilbmi ja min dološ dahje árbevirolaš máilbmi giesašit iešguđet guvlui, Holmberg čilge.

"Dát lea leamašan hui mávssolaš mátki"

Katja Gauriloff lea šaddan dovddusin máŋggaid árvvusadnon filbmabagadallamiinis.

Ovdamearkka dihte "Mannu mieʹcc Kaiʹssi", mii almmustuvai jagis 2016, oaččui máŋggaid bálkkašumiid. Varrasamos bagadeapmi, dán jagi almmustuvvan "Baby Jane" vuođđuduvai beakkán suopmelaš girječálli Sofi Oksanen seammanamat románii ja čájehuvvui ealligovvateáhteriin miehtá Suoma.

Baby Jane -elokuva, Katja Gauriloff
Filbmadahkki Katja Gauriloff lea bálkkašuvvon bagademiinis. Govva: Terhi Liimu / Yle

Internašunála Sámi filbmainstituhta dieđuid mielde sullii 70 proseantta Sámi filbmadahkkiin leat nissonat. Baby Jane almmustuvvama oktavuođas leige sáhka das, mo nissonat dominerejit sámi filbmamáilmmi.

Dát lea vuosttas guhkit filbmaprošeakta dáiddár Niillas Holmbergii. Son muitala dán leat sutnje persovnnalaččat hui mávssolaš vásáhus.

– Mun lean eanet earálágán čáppagirjjálašvuođain bargan. Dat lea dieđusge munnje leamašan maid hui miellagiddevaš mátki, ja lea ain dás duohkoge.

Näyttelijä Niillas Holmberg, Arktinen Odysseia, kansallisteatteri, 7.3.2017.
Dáiddár Niillas Holmberg lea dovddus earret eará dikta- ja girječállin ja musihkkárin, muhto fargga maiddái filbmadahkkin. Govva: Jari Kovalanen / Yle

Niillas Holmberg ja Katja Gauriloff eaba dušše bargga ovttas – soai leaba párra. Holmberg mielas leamaš hui erenomáš vásáhus ovttasbargat iežas guimmiin, guhte lea ámmátfilbmabagadalli.

– Dathan gal lea dieđusge hui vuogas munnje, ahte moai letne ovttas dan čállán, ja mun lean buktán dasa iežan attáldagaidan. Son lea dieđusge hárjánan dárjut namalassii filbmagiehtačállosa, mainna mun in leat nu olu bargan.

Mannet goittot vel jagit, ovdalgo Je’vida lea oaidninláhkai. Holmberg goit illuda, go sudno prošeakta ovdána vuot ovttain lávkkiin.

Álgoálbmotmuitalusaide ja -filmmaide lea jearalmas

Viesttarmáilmmis beroštupmi sámiid ja álgoálbmogiid filmmaide lea garrasit lassánan. Ovdamearkka dihte beaggán Frozen 2 -ealligovvii leat viežžan ideaid maid sámemáilmmis.

Frozen 2 -ealligovva.
Frozen 2 -ealligovas sáhttet leat árvitmeahttun stuorra váikkuhusat sámi- ja álgoálbmotmuitalusaid ja filmmaid boahttevuhtii. Govva: ©2019 Disney

Maiddái dáiddár Niillas Holmberg lea fuomášan fenomena.

– Obalohkái sáhttá lohkat, ahte sámekultuvrii ja álgoálbmotkultuvrraide lea eanet ja eanet beroštupmi olles máilmmis. Dat boahtá máŋggain sivain, ovdamearkka dihte das, ahte olbmot leat eanet moriheamen dasa, ahte lea dárbu smiehttat iežas eallima ođđasit ekologalaš geahččanguovllus, ja dieppe dat bohciida beroštupmi min eallimii ja vugiide.

– Dat vuhtto maid nu, ahte álgoálbmotdáiddabargguide addo eanet ja eanet árvu, mii lea dieđusge hirbmat buorre ášši, smiehtada dáiddár Niillas Holmberg.

Yle Sápmi ii fáhten maŋŋebárgga Katja Gauriloff kommenteret ášši.

Varrasamosat: Sápmi

Váldoođđasat

Varrasamosat

Muualla Yle.fi:ssä