Sápmi |

Ii leat vel sihkkar ožžotgo badjeolbmot buhtadusaid diimmá goavvejagis – Sirviö: "Čuovvovaš lávki lea ráđđádallagoahtit ruhtaministeriijain áššis"

Jus ášši ovdána stáhtaráđis ja dohkkehuvvo ráđđehusa lassibušeahtas, besset badjeolbmot ohcat heahtadoarjaga jo giđa áigge.

Tapani Sirviö
Eana- ja meahccedoalloministeriija ráđđádallagoahtá dán vahkkus ruhtaministeriijain áššis, muitala ráđđádalli virgealmmái Tapani Sirviö. Govva: Vesa Toppari / Yle

Badjeolbmot gártet velge vuorddašit dieđu das, ahte mákságo stáhta buhtadusaid diimmá goavvejagi dagahan vahágiin.

Eana- ja meahccedoalloministeriija ráđđádalli virgeolmmoš Tapani Sirviö dadjá, ahte makkárge mearrádusat eai leat vel dahkkon. Ministeriijas leat goit dál doarvái dieđut boazojámuin, ja maiddái čavčča njuovvanlogut leat dárkkistuvvon.

– Mis leat dál buot dieđut čoahkis ja dat leat sihkarastojuvvon. Čuovvovaš lávki lea ráđđádallagoahtit ruhtaministeriijain áššis. Jus buot ovdána bures doppe, de dan maŋŋel ášši sirdása stáhtaráđđái, čilge Sirviö.

Jus lassibušeahtas goaikkeha ruhta, doarjagiid beassá ohcat giđa mielde

Diimmá goavvejagi dihte Suoma eanan- ja meahccedoalloministeriija bijai Luondduriggodatguovddáš Luke čielggadit, deavdágo mannán dálvi heahtedoarjaga kriteraid.

Sirviö mielde ministeriija lea čavčča áigge čohkken ovttas guovlohálddahuseiseváldi AVI:iin dieđuid njuovvanmeriin ja mannan čađa maiddái heahtedoarjagiid máksinvuogádaga.

Dán vahkus eana- ja meahccedoalloministeriija čoahkkana ruhtaministeriijain seamma beavdegurrii. Jus ministeriijat leat ovttaoaivilis heahtedoarjagiid máksimis, ášši manná das viidáset stáhtaráđđái jođáneamus lági mielde.

Maŋemuš čuolbma ášši ovdáneamis lea ráđđehusa lassibušeahtta, mii gieđahallojuvvo árvalusaid mielde guovva-njukčamánus. Jus heahtedoarjja manná čađa lassibušeahtas, de dan seammás Lappi EJB-guovddáš rahpá doarjagiid ohcama. Doarjagiid ohcamis ruđaid oažžumii manná birrasiid guokte mánu, nuba ruđat soitet leat badjeolbmo burssas áramustá cuoŋo-miessemánus, čilge Sirviö.

Ollila: “Boazojámuid ferte buhttet”

Luke raporttas boahtá ovdan, ahte bálgosat árvvoštallet váile 15 000 bohcco jápmán diibmá. Muohta lei olu ja das ledje maiddái gaskkas jiekŋagearddit hehttemin guohtuma. Juos boazu olahii guohtut, bodni sáhtii leat báikkuid jikŋon dahje guhppon. Bálgosiid mielde barggut ja lassebiebmamii geavahuvvon fuođđariid mearri šadde measta guovttegeardásažžan.

Bálgosiid ovttastupmi lea iežas čielggademiin ja gažademiin gávnnahan, ahte diimmá goavvejahki dagahii juobe 23 miljovnna euro sturrosaš vahágiid boazoealáhussii. Lassin bođii vel koronakriisa, mii ii álkidahttán dili.

Bálgosiid ovttastumi doaimmajođiheaddji Anne Ollila sávvá, ahte heahtedoarjagiid máksinmearrádus ovdána jođánit stáhta vuogádagas.

– Mii leat vuordán dán mearrádusa juo nu guhká ja galhan daid boazojámuid ferte buhttet. Mis lea dan várás iežas láhkage, man ulbmil lea duvdit boazoealáhusa váttis áiggiid čađa. Dilli lea váttis ja sávan, ahte mearrideaddjit áddejit dan, dadjá Ollila.

Varrasamosat: Sápmi

Váldoođđasat

Varrasamosat

Muualla Yle.fi:ssä