Sápmi |

Ijahis idja-festivála ávvuda 15 jagi – prográmma almmustahtton

Ijahis idja – eamiálbmogiid musihkkafestivála prográmma lea dál almmustahtton. Lávddi alde leat earret eará A Tribe Called Red, Kevin Boine ja Felgen Orkester.

Ijahis idja 2018 plakáhta. Plakáhta lea hábmen Anárlaš daiddar Essi Ranttila.
Ijahis idja 2018 plakáhta. Plakáhta lea hábmen Anárlaš daiddar Essi Ranttila. Govva: Ijahis Idja -facebooksiiddut.

Ijahis idja – eamiálbmogiid musihkkafestivála ordnejuvvo borgemánus Anáris jo 15 geardde. Festiválavahkkolohppii gullet konsearttaid lassin earret eará ságastallanarena, sámi valástallangilvvut ja mánáid ja nuoraid prográmma.

Ijahis idja -festivála álgá mánáid ja nuoraidprográmmain. Bearjadaga ovddalgihtii almmuhan mánát ja nuorat oassálastet bargobájiide ja besset geahččat sámi filmmaid. Mánát maiddái čájehit iežaset dáidduid Ijahisija násttážat -nuoraidkonsearttas. Ijahis ija násttážat -konsearttas loaiddasta maiddái Solju-joavku.

Ijahis idja –festivála buvttadeaddji Oula Guttorm oaivvilda musihkkafálaldaga leat oalle viiddis ja sisttisdoallat iešguđetlágán stiillaid.

– Gávdno dakkár elektrovnnalaš dánsunmusihkka ja dasto luohti. Dieđusge midjiide lea dehálaš, ahte mis gullo luohti, dasgo eai sáhte leat menddo olu dakkár arenat, gos luohti gullosii almmolaččat. Mis lea goittotge dies stuorra rolla ja ovddasvástádus Suoma bealde eandalii, loktet lavdái ja gullosii dan luođi. Dasto dieđusge leat dat modearna sámemusihka stiillat, popmusihka ja rapmusihka ja dien diekkáraččat, ja joavkkut mat ovttastit luohteárbevieru ja ođđasut musihkkastiillaid.

Ijahis Idja eamiálbmogiid musihkkafestivála buvttadeaddji Oula Guttorm.
Ijahis Idja eamiálbmogiid musihkkafestivála buvttadeaddji Oula Guttorm. Govva: Inger-Elle Suoninen / Yle

Bearjadaga earret eará Kevin Boine ja A Tribe Called Red lávddi alde

Festivála rahpandoalut lea bearjadaga eahkes. Rahpanprográmmas loaiddastit juoigi Nils-Heikki Paltto sihke Indigenous Bastards -joavku.

Bearjadaga konsearttat Ijahis ija váldolávddis fállet juohkehažžii juoidá, go lávddi ala gorgŋejit Solju-joavku, pop-násti Kevin Boine ja kanadalaš DJ-kollektiiva A Tribe Called Red.

Bearjadaga lea maiddái njoarostansprintta ja festivála váldolágideaddji Anára Sámisearvi rs ávvuda 35 jagi doaluidis váldolávddis.

Ijahis idja 2017
Ijahis idja 2017. Govva: Ville Fofonoff / Yle

Eahketkonsearttaid lassin Yle Sápmi -arena ja musihkkaseminára

Lávvordaga festiválabeaivvi álggaha musihkkaseminára, mii lágiduvvo sámemuséas, Siiddas. Ávvujagi semináras fáddán lea Ijahis idja. Aslak Paltto jođihan panelaságastallamis vihkkedallet Ijahis Ija historjjá ja mearkkašumi otná sámemusihkkii ja musihkkariidda.

– Dat musihkkaseminára lea aivve dan birra, ahte manin aiddo Ijahis idja ja mii lea dan mearkkašupmi sámemusihkkariidda, muhto dieđusge maiddái min servodahkii. Goittotge Ijahis idja lea áidna dakkár stuorra sámemusihkkadáhpáhus Suomas, mii čohkke olbmuid deaivvadit ja gávnnadit. De dat lea dasto guovddážis dien semináras, muitala Oula Guttorm.

Ovdal eahkeda konsearttaid festiválaguovllus lea YleSápmi -arena. Yle Sápmi -arena lea ságastallandilálašvuohta mas gieđahallet áigeguovdilis fenomenaid ja olbmuid. Ságastallan lea buot Suomas hubmon sámegielain.

Eahketbeaivi joatkašuvvá Sajosa auditoriaskonsearttain ”Luohti ja Suõmmkar”. Konsearttas juiget Berit Alette Mienna, Ingá Elisá Påve Idivuoma, Hildá Länsman sihke Iŋgá-Máret Gaup-Juuso. Suõmmkar-joavku fas almmustahttá iežas debyhtaalbuma.

Suõmmkarin ensimmäinen konsertti Helsingissä 12.6.
Suõmmkar-joavku. Govva: Mari Korpimäki

Lávvardaga váldolávddis loaiddastit Hildá Länsman ja Viivi Saarenkylä Vildá-joavku, Felgen Orkester, Amoc & Ailu ja TrioBoogiemen, Tundra Electro ja árbevirolaš juoigit.

Lávvardaga konsearttaid olis valastallet ja šládjan leat jođánis ja dárkilvuođa gáibideaddji njoarosteapmi.

Ijahis idja ordnejuvvo borgemánu 17.-19.7. Anáris. Bileahtaid vuovdin álgá ihtin suoidnemánu 3. beaivve.

Ijahis ija ordnejit ovttas Anára Sámisearvi ry, Sámediggi, Sámi oahpahusguovddas, Sámemuséa Siida, Anára gielda, Dáidagaovddidanguovddáža Lappi doaibmabáiki, Yle Sápmi ja Hotelli Kultahovi.

2.7.2018 dii: 1240: Ijahis idja –festivála buvttadeaddji Oula Guttorma kommeanttat lasihuvvon.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä