Sápmi |

Ijahis Idja -eamiálbmotfestivála prográmma almmustuvvan – Temákonseartta guovddážis Sámi diktagirjjálašvuohta

Dán jagáš temá ulbmilin lea čalmmustahttit sámegielaid ja eamiálbmotgielaid girjáivuođa.

Inger-Mari Aikio, girječálli
Prográmmas lea stuorra temákonsearta Háliidivččen, mii čatná divttaid, luđiid, musihka ja lávlagiid oktii dáiddalaš vugiiguin. Konseartta lea leamašan plánemin diktačálli Inger-Mari Aikio ja son lea ráhkadan konsearttas fiinna ollisvuođa. Govva: Kirsti Länsman / Yle

Ijahis Idja -festivála prográmma lea dál almmustahttojuvvon. Konsearttaid lassin festiválavahkkoloahpa lágiduvvojit ságastallanarena, duodjemárkanat, sámi valáštallangilvvut ja mánáid ja nuoraid prográmma.

Temán festiválas lea Ovttastuvvan Našuvnnaid eamiálbmotgiellajagi mielde sámegielat.

Ijahis Idja -festivála dáiddalaš jođiheaddji Anna Näkkäläjärvi-Länsman illuda, go dán jagáš temá ulbmilin lea čalmmustahttit sámegielaid ja eamiálbmotgielaid girjáivuođa.

– Dieđusge sámegiella lea mis guovddážis álohii ja mii geavahit dan dieđusge, muhto dán jagi mii leat maiddái háliidan váldit mielde divttaid ja girjjálašvuođa, čilge Näkkäläjärvi-Länsman.

Vuos mánáid- ja nuoraidbeaivi, de panelaságastallan girjjálašvuođa mearkkašumis

Ijahis Idja -festivála álgá árbevirolaččat bearjadaga 16.8. mánáid- ja nuoraidbeivviin. Ijahis Ija Násttážat-konsearttas lávddi ala lávkejit mánáid ja nuoraid lassin Wimme Saari, Mihkku Laiti ja eamiálbmotguossi Aydar Churupov, guhte boahtá Siberias Altai-guovllus. Son ovddasta Telengit-álbmotjoavkku.

Festivála rahpandoalut leat bearjadaga 16.8.2019 eahkedis diibmu 18.00 rájes. Rahpandoaluid áigge lávddi ala lávkeba juoigi Nils-Heikki Paltto ja diktačálli Inger-Mari Aikio. Rahpandoaluid olis rahppojuvvojit duodjemárkanat, mat bistet gitta lávvardahkii.

Rahpandoaluid maŋŋá prográmma joatkašuvvá Ijahis Idja -arenain, Gollegiellamet-panelaságastallamiin. Panelaságastallama jođiha sátnefriddjavuođaorganisašuvdna Suoma PEN-klubba stivrra lahttu Pirita Näkkäläjärvi ja dan áigge ságastallet girjjálašvuođa mearkkašumis sámekultuvrii, sámeservošii ja áitatvuloš sámegielaide.

Lávvardaga ordnejuvvo Sámemusea Siidda olgomuseas ođđalágan konsearta.

– Seminára ii leat dán jagi, muhto Siiddas lea eará prográmma dalle lávvardaga beaivit. Doppe lea olgomuseas konsearta gos lea váldonástin Wimme Saari. Dat lea sihkkarit oalle fiinnis doppe olgomuseas beassat vásihit dakkára, dadjá Näkkäläjärvi-Länsman.

Sámi diktagirjjálašvuohta temákonseartta guovddážis

Lávvardaga prográmmas lea stuorra temákonsearta Háliidivččen, mii čatná divttaid, luđiid, musihka ja lávlagiid oktii dáiddalaš vugiiguin. Konseartta lea leamašan plánemin diktačálli Inger-Mari Aikio ja son lea ráhkadan konsearttas fiinna ollisvuođa.

– Dat konsearta boahtá sisttisdoallat divttaid ja musihka, ja dieđusge maiddái árbevirolaš divttaid ja luđiid. Dat lea hui miellagiddevaš beassat geahččat, makkár dat ollisvuohta lea. Doppe lea Inger-Mari dieđusge mielde lohkamin iežas divttaid, muitala Näkkäläjärvi-Länsman.

– Dasto Ruoŧa bealde boahtá Ánná Káisá Partapuoli, ja son lea dakkár slam-poet. Dat lea vehá earálágan stiila, nu ahte mii gullat das hui earálágan divttaid.

Konsearttas lea mielde maid Niko Valkeapää musihkka. Nikohan čállá iežas teavsttaid ja dat leat nugo divttat, ja son dego lávlu daid iežas divttaid ja várra maid lohká muhtin divtta. Ja de doppe lea luohti Várjjatvuonas, muitala Näkkäläjärvi-Länsman.

– Dat lea várra máŋga jagi leamašan dakkár gažaldat midjiide, ahte manin dii ehpet váldde daid diktačálliid mielde. Dál mii háliideimmet go lei dat erenoamáš jahki. Min mielas dat lei hui vuogas.

Eahketkonsearttain Sámi stuorra násttit

Bearjadaga eahketkonsearttas váldolávdái lávkejit anáraš lávlu ja livđe-čeahppi Anna Morottaja, ođđa skearru almmuhan Niko Valkeapää, váldonásti Mari Boine ja eahkeda loahpaha DJ-joavku Article 3.

Lávvardaga eahketkonsearttas váldolávddis loaiddastit Máttut-konseartta juoigit, juoigi Øystein Nilsen, eamiálbmotguossi ja čottalávlu Aydar Churupov, ubmisámegielat lávlu Katarina Barruk, pop-joavku Isák ja sámi folkrock-joavku Sančuari.

Ijahis Idja -festivála bileahtaid ovddalgihtii vuovdin álgá bearjadaga 5.7.

Ijahis Idja ordnejuvvo 16. geardde Anáris borgemánu 16.-18.8.2019.

Ijahis Idja -festivála prográmma gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä