Sápmi

Ijahis idja -festivála neahttakonseartta távttas sáhttá lávvardaga doallat unna soffádoaluid – Buvttadeaddji muittuha: "Ii boađe oaidninláhkái maŋŋá"

Ailu Valle Ijahis Idja 2018
Ráppár Ailu Valle showas leat vuordimis máŋggat elemeanttat. Govva: Vesa Toppari / Yle

Ijahis idja -festivála háliida dán jagi temákonseartta bokte čájehit iežas doarjaga Giehtaruohttasa guvlui ja dadjat ii ruvkedoaimmaide Sámis.

Dán jagáš Ijahis idja sáddejuvvo lávvardaga 15.8. neahttasáttan Anáris, sámekulturguovddáš Sajosis. Prográmmas leat golbma konseartaoasi. Lávddi alde loaiddastit juoigit Iŋgá-Máret Gaup-Juuso ja Juha Tornensis. Dan maŋŋá konseartalávddis lea vuos Gájanas-joavku ja dan maŋŋá vel ráppár Ailu Valle.

Konsearta álgá lávvardaga diibmu 19.00 čujuhusas www.sajos.fi/live. Dan sáhttá čuovvut dušše njuolggosáttan, iige dat boađe oaidninláhkái maŋŋá. Konseartasáddaga čuovvun lea nuvttá, muhto báikki ala geahččit eai goittot beasa.

Konseartta lágideaddjit ávžžuhitge čohkket lagaš olbmuid oktii ja geahččat ja guldalit sáddaga ovttas.

Gaup-Juuso ja Tornensis juoigaba Giehtaruohttasa luđiid

Juoigi Iŋgá-Máret Gaup-Juuso loaiddasta vuosttaš konseartaoasis, man temán lea čájehit doarjaga Giehtaruohttasa ruvkedoaibmaplánaid vuostá. Konsearttas juoigá maiddái Juha Tornensis. Dasa lassin gullat olbmuid, geat barget árbevirolaš ealáhusaiguin guovllus.

Iŋgá-Máret Gaup-Juuso mielas lea hui buorre go Ijahis idja -festivála čalmmustahttá Giehtaruohttasa guovllu ja veahkeha ná guovllu olbmuid dáistalit ruvkeplánaid vuostá.

– Dathan lea duođalaš ášši, man lea buorre čalmmustahttit. Lea hui buorre, ahte lágiduvvo dákkár konsearta, dadjá Gaup-Juuso.

Juoigi ii sáhte goassege áibbas sihkkarit diehtit makkár luđiid lávddis rohttesta. Gaup-Juuso lea goit jurddašan juoigat Giehtaruohttasa guovllu luđiid.

– Dat ruvkeplána guoská Ergoniid guohtuneatnamiidda, de mu mielas orru lunddolaš, ahte mun boađán váldit muhtin luđiid mat gullet Ergoniid sohkii. Dat bohtet leat árbevirolaš luođit.

Tundra Electo Ingá-Máret Gaup-Juuso Ijahis Idja 2018
Ijahis idja -streamsátta álgá lávvardaga 15.8. diibmu 19.00 konsearttain, mas juoigaba Iŋgá-Máret Gaup-Juuso ja Juha Tornensis. Govva: Vesa Toppari / Yle

Hildá Länsman Gájanas-joavkkus: "Fiinna fálaldat"

Gájanas-jovkui gullet lávlu ja juoigi Hildá Länsmana lassin Kevin Francett, Nicholas Francett ja Erkki Feodoroff. Joavku čuojaha sámegielat etno-progemusihka. Joavku válljejuvvui jagis 2017 Kaustinen álbmotmusihkkafestivála jagi musihkkajoavkun.

Hildá Länsman illuda das, ahte konsearttaid sáhttá streamet ja olbmot besset čuovvut konsearttaid ruovttus.

Gájanas
Gájanasa konsearta Ijahis idja -streamis álgá 19.30. Govva: Tarmo Lehtosalo

– Alddán lea leamašan fiinna vásáhus, maid mun lean čuvvon daid streamkonsearttaid iežan ruovttus, ahte dat lea masá dego beasašiige báikki ala konsertii. Dat lea hui fiinna fálaldat mii fállojuvvo dál. Go dát dilli lea diekkárin šaddan, ahte dat lea masá veadjemeahttun muhtun festiválaide dan dábálaš konseartta ordnet.

Gájanasas lea ulbmilin almmustahttit skearru boahtte jagi álggus. Hildá Länsman lohká, ahte konsearttas boahtit gullat bihtáid dan ođđa skearrus.

Länsmanis leat maid tipsat gehččiide vai livčče vejolaš goit geahččalit beassat festiváladovdui ruoktosoffás.

– Sáhttá dego uhca doaluid doallat, bidjat juoga snacksaid diehko. Dieđusge jus gávdnojit buorit jietnarusttegat, de dathan lea hui fiinnis. Jus lea dakkár bearaš, mas leat fiinna jietnarusttegat ja buorre TV, de áinnas doallabehtet unna soffádoaluid ja návddašehket konsearttas, Länsman ávžžuha.

Ailu Valle showas dánsunkoreografiija

Ráppár Ailu Valle konsearta lea eahkeda maŋimuš ja álgá diibmu 20.15. Valle showas leat máŋggat elemeanttat rap-musihka lassin. Dánsut Janita Rantanen ja Niina Rajaniemi leaba bargan koreografiija konsertii ja bihtáid čuojaha DJ Uyarakq.

Ailu Valle
Ailu Valle konsearta Ijahis idja -streamsáddagis lávvardaga diibmu 20.15. Govva: Vesa Toppari

Konsearttas gullat bihtáid earret eará diibmá almmustuvvan Viidon sieiddit -albumas. Skearru almmustahttimis lea jahki, muhto lihkká bihtát leat oalle ođđa, go daid ii leat beassan čuojahit lávddis go dušše moddii. Valle lea bargamin ođđa musihka olles áigge, muhto lávvardaga konsertii smáhkkabihtážat eai olle.

Vaikko Valle ii leatge earenoamážit Giehtaruohttasa plánaide čujuhan bihtá, de lihkká su bihttávuorkkás gávdnojit máŋggat šuoŋat ruvkedoaimmaid vuostálastimis. Ovdamearkka dihte Ancestors -bihttá heive njuolga temái.

– Ii eará, go návddašit ruovttus ja ávvudit minguin virtuálalaččat ovttas, lohká Valle gehččiide.

Buvttadeaddji: "Ii boađe oaidninláhkái maŋŋá"

Festiválabuvttadeaddji Oula Guttorm ávžžuha songe olbmuid čoahkkanit unna joavkkuide geahččat sáddaga ovttas, jus dáinna lágiin beasašii goit vehá eambbo festiváladovdui.

Fáddágilkor #ijahisidja2020 bokte sáhttá sosiálamedias čájehit dan, ahte lea čuovvumin konseartta.

– Mii lágideaddjit sávvat, ahte olbmot gehččet dan sáddaga. Dathan ii boađe leahkit oaidninláhkái maŋŋá, muittuha Guttorm.

Oula Guttorm, Ijahis Idja
Festiválabuvttadeaddji Oula Guttorm ávžžuha olbmuid čoahkkanit unna joavkkuide geahččat konseartta. Govva: Vesa Toppari / Yle

Guttorm ii jáhke, ahte dákkár neahttakonsearta boađášii goassege oalát buhttet albmalágán konsearttaid, mas olbmot leat ovtta sajis, muhto juogalágán ilu das sihkkarit goittotge fidne. Son lea dan mielas, ahte festivála šluhtten koronadili geažil lei rivttes mearrádus.

– Dieđusge dán spiehkastatdilis dát ordnejuvvo dánlahkái ja mii sávvat, ahte dat buktá olbmuide buorre miela ja buorre vásáhusaid.

Varrasamosat

Muualla Yle.fi:ssä