Sápmi |

Ijahis idja -festivála prográmma lea almmustahtton – lávddi ala njuikejit earet eará Jon Henrik Fjällgren sihke ráppárat Ailu Valle ja Amoc

Konsearttaid lassin prográmmas leat valáštallangilvvut, duodjemárkanat ja mánáid ja nuoraid prográmma. Dán jagi ordnejuvvojit vuosttaš háve pop up -bargobájit.

Ailu Valle Amoc Trio Boogieman
Amoc ja Ailu Valle leaba ovdalge loaiddastan Ijahis idja -festiválas ovttas Trio Boogiemen -joavkkuin. Govva: Vesa Toppari / Yle

Ijahis idja -eamiálbmogiid musihkkafestivála prográmma lea dál almmustahtton. Dán jagaš festivála lea ovtta beaivásaš, muhto nugo ovdalge, prográmmii gullet konsearttaid lassin earret eará sámi valástallangilvvut, duodjemárkanat, mánáid ja nuoraid prográmma ja dán jagi ođasvuohtan maiddái pop up -bargobájit.

Festiválaguovlu rahpasa lávvardaga 14.8. dii 14.00. Dalle rahpasit maiddái duodjemárkanat.

Nuoraidkonsearttas fállet guldaleddjiide Sámi musihka garrasamos ođasvuođaid, go lávddi ala bohtet earret eará Láhppon ja Sámenuoraid dáiddadáhpáhusas oahpis Kootkmiõhtt!

Anára Sámisearvi lágida njoarostangilvvu, mas oassálastit besset iskat suohpangieđaset Sajosa šiljus.

– Jos njoarosteami háliida hárjehallat ovdal gilvvu dahje muđui beare oahpásmuvvat njoarosteapmái, njoarosteami álgooahppu -bargobájis lea vejolaš gazzat oahpu. Maiddai mánáide ja nuoraide leat bargobájit ja festiválaguovllus lea vejolaš málet graffiti ovttas Sámi Hustleriin, čállá Ijahis idja dieđáhusastis.

Konsearttain earet eará árbevirolaš luohti ja rap-musihkka

Eahketkonsearttaid festiválaguovllus rahpá U ́lljan & Saauj Cool Band. Joavku vuosttaš skearru almmustuvai geasset 2020.

Vuosttas háve Ijahis ija váldolávddis leat maiddái Ozas ja Yungmiqu.

Festiválas gullo maiddái árbevirolaš luohti, go lávddi ala njuikejit Niiles-Jouni Aikio, Bigga Aikio ja Laura Tapiola.

Eahkeda maŋimuš artisttat lea Sámi stuorra násttit, Jon Henrik Fjällgren sihke sámegielat ráppárat, Ailu Valle ja Amoc, geat almmustahttiba oktasaš skearru dán jagi. Ailu Vallein ja Amociin čuojaha Trio Boogiemen.

Festivála dieđiha bileahttavuovdimis sierra. Bileahtaid vuvdet sihke ovddalgihtii ja uvssas.

Ijahis ija ordnejit ovttas Anára Sámisearvi ry, Sámediggi, Sámekulturguovddáš Sajos, Sámi oahpahusguovddáš ja Anára gielda.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä