Sápmi |

Ijahis Idja -festiválii dárbbašit ain eaktodáhtolaččaid – "Mun veháš balan ahte oažžutgo doarvái eaktodáhtolaš bargiid"

Ijahis idja –festivála eaktodáhtolaš bargit ožžot festiválapássa bearjadaga ja lávvardaga váldokonsearttaide.

Anna Lumikivi
Anna Lumikivi lea Ijahis Idja -festivála veahkkebuvttadeaddji. Govva: Sáárá Seipiharju / Yle

Diibmá ledje muhtimat jo miessemánus jearran ahte beasašiigo festiválii eaktodáhtolažžan. Dán jagi Ijahis idja -festiválii leat ožžon minima meari bargiid, muhto vel dárbbašit eaktodáhtolaččaid.

Veahkkebuvttadeaddji Anna Lumikivi okta ballu lea dat ahte sii eai oaččo doarvái eaktodáhtolaččaid.

– Mun veháš balan ahte oažžutgo mii doarvái eaktodáhtolaš bargiid. Dat lea dađistaga buorránan ja dál mis álgá leat minima bargiidmearri.

– Dieđusge livčče buoret juos livčče vel eanet dan dihte juos vaikko muhtun buohccá de livčče goittotge doarvái bargit.

Lumikivi mielas lea gánnihahtti boahtit eaktodáhtolažžan.

– Lean sosiála medias čállán ahte dárbbašivččiimet eanet bargiid, dat lea buorre deal go bargá moadde diimmu bargguid de oažžu oba vahkulohppii festiválapássa, son muitala.

Ijahis Idja -festivála dárbbaša eaktodáhtolaš bargiid veahki earet eará johtalusa stivremis, bileahtaid vuovdimis ja festiválabáikki čorgemis. Sii fállet eaktodáhtolaččaide maiddái liegga borramuša.

Juos háliidat bargat eaktodáhtolažžan almmut iežat nama, e-poastačujuhusa, telefonnummira ja sávaldaga man beaivve háliidivččet leat barggus.

Lassedieđut ja almmuheamit: Veahkkebuvttadeaddji Anna Lumikivi / anna.lumikivi(at)samediggi.fi / +358 40 684 1957

Ijahis Idja lágiduvvo Anáris 16.-18.8. Yle Sápmi lea okta Ijahis idja -festivála lágideddjiin.

Varrasamosat: Sápmi

Váldoođđasat

Varrasamosat

Muualla Yle.fi:ssä