Sápmi

Ijahis idja -musihkkafestivála dán jagi dušše soffá alde – temákonsearttain čájehit doarjaga Giehtaruohttasii

Ijahis idja 2015
Dán jagi sáhttá dušše ruovttus čiŋadit gávttiin go geahččit eai beasa festiválabáikái. Govva: Vesa Toppari / Yle

Konsearttas loaiddastit rap-artista Ailu Valle, Gájanas-joavku sihke juoigit Iŋgá-Máret Gaup-Juuso ja Juha Tornensis.

Ijahis idja -festivála konsearta sáddejuvvo njuolggosáttan 15.8.2020 Anáris, sámekulturguovddáš Sajosis. Konseartasáddaga čuovvun lea nuvttá, muhto báikki ala geahččit eai goittot beasa.

Ijahis idja -festivála háliida dán jagi temákonseartta bokte čájehit iežas doarjaga Giehtaruohttasa guovllu árbevirolaš geavaheddjiide ja dadjat ovttas ii ruvkedoaimmaide Sámis, muitala festivála buvttadeaddji Oula Guttorm.

Temákonsearttas juiget Iŋgá-Máret Gaup-Juuso ja Juha Tornensis. Ailu Valle ja Gájanas-joavku fállet konsearttas modeardna sámemusihka. Dán jagi beassat oaidnit maiddái juoidá maid eat leat ovdal oaidnán.

– Ailu Valles lea dál dakkár konsearta, man eat leat nu olu oaidnán. Sus leat dánsut ja DJ mielde, muitala Guttorm.

Buvttadeaddji diehtá, ahte festiválas váilu dat buot deháleamos ášši dalle go dat ordnejuvvo neahta bokte. Dat lea namalassii olbmuid deaivvadeapmi báikki alde.

– Mun dieđusge sávan, ahte olbmot de rahpet sáddaga go áigi boahtá, buvttadeaddji sávvá.

Ijahis idja -konseartta sáhttá čuovvut lávvardaga 15.8. dmu 19.00 rájes čujuhusas www.sajos.fi/live.

Varrasamosat

Muualla Yle.fi:ssä