Sápmi |

Ijahis idja nogai Njuorggámis: Suvi Järvensivu návddaša Sámi geasis ja šálloša go čuvges ijat nohket

Njuorggámis ijahis idja nogai gaskavahku ja duorastaga gaskasaš ija. Ijahis ija nohkan mearkkaša dan, ahte beaivváš luittii mannán ija horisontta vulobeallái bottožii.

Suvi Järvensivu
Suvi Järvensivu boahtá Ohcejohkii millosit geasset go dálvet skábman. Son návddaša ijahis ijas. Govva: Priváhta

Čuvges ijat ja beaivvit, dakkár lea Sámi geassi, mii ii bistte agibeaivve, muhto moadde mánu goit. Dál dat lea goit dán geassái juo maŋábealde Njuorggámisge. Ijahis idja nogai gaskavahku ja duorastaga gaskasaš ija diibmu 0.32.

Suvi Järvensivu lea boahtán geasselupmui Ohcejohkii geassemánus. Su mielas geassi Sámis ja Ohcejogas lea hui somás áigi, ja son šállošage go ijahis idja nogai ja eahkedat sevnnjodišgohtet.

– Dieđus lea vehá váivi go geassi lea nohkamen, muhto nuppe dáfus dat mearkkaša munnje, ahte lubmenáigi álgá. Mun muittán mánnávuođa rájes, ahte mii leat álo borgemánu álggus vuolgán lubmet.

Järvensivu ieš gal liiko eanet geasseáigái go sevdnjes dálveáigái. Su mielas juohke jagiáiggis leat goittotge buorre ja fuones bealit. Jagiáiggit goittotge váikkuhit olu maid olbmot sáhttet dahkat.

– Dien dáfus, ahte geassit geargá bargat olu olgun, ja olgun lea vejolašvuohta leat guhkká. Dieđus skábmaáigge ii leat diekkár vejolašvuođa. Gal mun milloseabbot geasset lean Ohcejogas go dálvet, skábmaáigge eandalii.

Čuvges ijat nohket Sámis
Ijahis idja nohká ja ijas sevnnjodišgohtet. Dákkár lei UK-álbmotmeahcis geasset 2019. Govva: Maiju Saijets / Yle

Meteorologa: Beaivváš ii leat luoitán Njuorggámis horisontta vulobeallái badjel guovtti mánnui

Dálkedieđalágádusa meteorologa Anja Häkkinen muitala, ahte Njuorggámis ijahis idja nogai mannan ija.

– Beaivváš luittii diibmu 0:32. Dat lea badjánan miessemánu beallemuttus 15.5 diibmu 1:41. Dat lea sullii guokte ja bealli mánotbaji bistán dat áigi, go beaivváš lea oidnon iige leat luoitán horisontta vulobeallái.

Häkkinen muitala, ahte eará sajis Sámis ijahis idja lea nohkan juo árat. Ovdamearkka dihtii Anáris juo mannan vahkus nappo suoidnemánu 23. beaivve ja Ohcejogasge suoidnemánu 28. beaivve.

Ijahis ija nohkan dárkkuha dan, ahte beaivváš luoitá horisontta vulobeallái bottožii. Häkkinen muitala, ahte justa dál dat bistá diibmobealis gitta diibmui.

– Dasto go čakčaluvvá, de dat jávká guhkit áigge doppe horisontta vulobealde ja gerpmoda.

– Čakčajorggáldaga sulaid čakčamánu beallemuttu maŋŋá álgá leat dan veardde seavdnjat, ahte násttit oidnogohtet. Earenoamážit borgemánus dat ijat gal sevnnjodastet.

Guldal maid Suvi Järvensivu ja Anja Häkkinen muitaleaba áššis. Jietna: Sáárá Seipiharju, Jouni Aikio / Yle

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä