Sápmi |

Ijahis ija buvttadeaddji maŋimuš tipsa: Árbevierrun šaddan duodjemárkanat ja valáštallangilvvut

Festiválas ordnejuvvojit duodjemárkanat ja valáštallangilvvut. Dán jagi valáštallangilvvut leat rievdan ja ođđa doaibmanvuohki váldojuvvo geavahussii. Loga dás, makkár rievdadusat leat dán jagáš festiválas.

Ijahis Idja
Duodjemárkanat rahpasit bearjadaga diibmu 18:00 ja lávvardaga diibmu 15:00. Govas duojit jagi 2017 Ijahis ija duodjemárkaniin. Govva: Ville-Riiko Fofonoff / Yle

Ijahis idja -festivála ordnejuvvo dán jagi juo 16. geardde.

Ijahis idja lea musihkkafestivála, muhto festivála árbevierrun leat šaddan duodjemárkanat ja valáštallangilvu. Dolin olbmot čoahkkanedje márkanastit, ja Ijahis ijas dat lea maid vejolaš. Festiválas beasat návddašit earet eará musihkas, girjjálašvuođas, dujiin ja valáštallamis.

Ijahis ija buvttadeaddji Oula Guttorm mielde duodjemárkaniin lea buorre liiba gávppašit dujiid.

– Go boahtá festiválii, de seammás dasto sáhttá gávppašit ja mii leat maiddái dán jage ožžon vuovdiid miehtá Sámi.

– Dathan lea dieđusge somás lassi festiválagussiide, jus jurddaša ahte oassi dáid vuovdiin leat dakkárat, geain eai leat ovdamearkka dihte interneahttagávppit dahje diekkárat, ja soaitá leat váttisge sis oastit buktagiid, muitala Oula Guttorm.

Dán jagi festivála duodjemárkaniid vuovdit leat Erica Huuva, Katja Magga Design, Ateljee Huopapirtti Kaija Paltto, Duodji Shop, Sompion lahja ja koru ja Mucca Design. Duodjemárkaniidda beassá sisa festiválagiehtabáttiin.

Ijahis Idja 2018
Livččego dus miella geahččalit njoarosteami? Searvva áinnas mielde Ijahis ija valáštallangilvvuid njoarosteapmái lávvardaga diibmu 19:00. Govva diimmá njoarostangilvvus. Govva: Vesa Toppari / Yle

"Sávvat maiddái eai nu dovddus -suohpangieđaid searvat"

Valáštallangilvvut gullet maid nannosit Ijahis idjii. Valáštallangilvun lea njoarosteapmi.

– Mishan lea leamaš ovdal maiddái dakkár mas ferte njoarostit ja viehkat, muhto dál mis lea dušše dat njoarosteapmi, dadjá Oula Guttorm.

Festivála buvttadeaddji ávžžuha olbmuid roahkkadit searvat valáštallangilvui.

– Dieđusge sávvat ahte olbmot bohtet geahččalit, maiddái dakkár olbmot geat eai leat juo dovddus suohpangieđat. Dat lea áibba suohtas vásáhus sihkkarit buohkaide ja bálkkašumit leat dieđusge maiddái. Ja njoarosteapmi lea dalle lávvardaga diibmu čieža eahkedis.

Festivála dorvvolašvuođa vigget lasihit dorvodárkkistemiin

Buvttadeaddji Oula Guttorm mielde festiválaguovlu bissu sullii seammaláganin go ovdalge. Okta ođastus festiválas váldojuvvo geavahussii dán jagi.

Buot gussiid lávkkat dárkkistuvvojit festiválii boađedettiin.

– Dán jagi midjiide bohtet dego dorvodárkkistusat nu, ahte ii leat lohpi ovdamearkka dihte buktit iežaset alkoholaid, narkotihkaid dahje vearjjuid dohko festiválaguvlui, muitala Guttorm.

Parkerensadji lea dán jagi Anára boares vuolleskuvlla šiljus. Oula Guttorm muittuha olbmuid leahkit várrugas geainnuid rasttildettiin.

– Parkerenbáiki lea njelješgeainnu nuppe bealdi ja doppe go šilttaid čuovvu, de beassá dohko (parkerenbáikái), ja dasto go doppe čuovvu šilttaid de beassá festiválaguvlui, muitala Guttorm.

Beaividuvvon bearjadaga 16.8.2019 dii. 10.50: Listu duodjemárkaniid vuovdiin beaividuvvon ođđa dieđuid mielde.

Varrasamosat: Sápmi

Váldoođđasat

Varrasamosat

Muualla Yle.fi:ssä