Sápmi |

Ijahis ija buvttadeaddji njealját festiválatipsa: Giellajahki oidno ja gullo – Fárus giellaofelaččat, Ijahis idja -arena ja unnitlogugielaid artisttat

Jahki 2019 lea Ovttastuvvan Našuvnnaid álgoálbmotgielaid jahki. Ijahis ijas dat oidno máŋgga prográmmaoasis.

Katarina Barruk
Katarina Barruk lea ubmisámegielat artista. Govva: Priváhta govva

Ijahis ija buvttadeaddji Oula Guttorm muitala ahte giellajahki oidno eanet dahje uhcit dihtolágán prográmma osiin.

– Go diđiimet ahte dat giellajahki lea dán jagi, de dat lei midjiide iešalddes čielggas ahte mii dan čalmmustahttit ja váldit dego temán dan dáhpáhussii, dadjá Guttorm.

– Mis bohtet leahkit dákkár giellaofelaččat doppe geat vigget movttáskahttit olbmuid geavahit sámegielaid.

Ijahis Idja -arenas fáddán gollegiellamet

ON eamiálbmotgielaid jagi gudnin sátnefriijavuođaorganisašuvdna Suoma PEN-klubba lágida panelaságastallama

– Das lea ulbmilin čalmmustahttit sámegielaid, suokkardallat daid gielaid diliid ja beassat dasto čiekŋalabbui dan girjjálašvuođa dillái. Pirita Näkkäläjärvi jođiha dán ságastallama, muitala Guttorm.

Mielde ságastallamin leat árrabajásgeassinoahpaheaddji, bloggejeaddji ja vánhen Niina Siltala, girječálli Niilo Aikio, Nuortalaškulturfoandda áššealmmái Mari Korpimäki ja Suoma sámedikki gielladorvočálli Anne Kirste Aikio.

“Mii leat viggan ohcat artisttaid iešguđege sámegielain”

Guttorm muitala ahte sii leat bures lihkostuvvan oažžut artisttaid maiddái unnitlogu sámegielain.

– Mis lea ubmisámegielat artista já dieđusge anáraš já davvisámegielat ja nuortalašgielat artisttat, muitala Guttorm.

Ubmisámegielat artista lea Katarina Barruk. Son ieš komponere su musihka, man stiila lea lahka pop ja rock. Son maiddái geavaha elemeanttaid luđiin. Sus lea almmustuvvan okta álbuma: Báruos. Barruk lea ovttasbargan Frode Fjellheimiin, guhte lea heivehan ja buvttadan su musihka.

Ijahis idja -festivála prográmma gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä