Sápmi |

Ijahis ija buvttadeaddji nubbi festiválatipsa: Mo čuodjá dološ hárpa? – Fállun maiddái juoga, gosa besset dušše jođáneamos bileahttaoastit

Dán jagi Ijahis idja -festivála fállá vuot earáge álgoálbmogiid loaiddasteami ja sin árbevieruid. Fállun lea ovdamearkka dihte čottalávlu dološ hárppain.

Aydar Churupov lea Altai álbmotčuojanasaid meašttir.
Aydar Churupov lea Altai álbmotčuojanasaid meašttir. Govva: priváhta govva

Dán jagi Ijahis idja -festivála fállá vuot earáge álgoálbmogiid loaiddasteami ja sin árbevieruid.

Dán jagi festivála álgoálbmot guossin lea Aydar Churupov. Son lea šuokŋadahkki, guhte máhttá maiddái árbevirolaš kai-čottalávluma.

– Dasa lassin Churupov lea Altai álbmotčuojanasaid meašttir, muitala Marina Falevitch Sámi oahpahusguovddážis.

Earenomáš Churupov konsearttas lea juoga, mii lea hutkojuvvon áigá dolin.

– Churupov lea lea váldán sin árbevirolaš čuojanasa atnui, muitala Oula Guttorm, guhte lea Ijahis idja -festivála buvttadeaddji.

– Dat čuojanas lea hutkojuvvon jo vihtta čuođi jagi ovdal áiggi rehkenastima álgima. Miellagiddevaš gullat, makkár jietna das boahtá, muitala Oula Guttorm.

Churupov loaiddasta maiddái mánáidkonsearttas bearjadaga. Su váldokonsearta lea lávvardaga gávcci maŋŋá.

Áitojuvvon nanai-gielas beasat gullat lávvardaga Sámemusea Siiddas

Deaddiluvvon prográmmas ii čuoččo visot. Ođđa fálaldahkan lea boahtán Nanai-giela giella- ja kulturseminára Sámemusea Siiddas. Seminára álgá 17.8.2019 diibmu 11.

– Doppe lea mielde Churupov lassin nanai-giela dutkiprofessor Tatiana Bulgakova. Seminára lea dulkojuvvon, muittuha Guttorm.

Bulgagova lea leamašan earret eará dulkan dutki Juha Pentikäinen mátkkiin.

Nanai-giela dutkiprofessor Tatiana Bulgakova boahtá muitalit nanai-gielas. Govva šamána nissonis lea váldojuvvon jagis 1993, go Bulgagova ja Juha Pentikäinen leigga oktasaš dutkanmátkkis.
Nanai-giela dutkiprofessor Tatiana Bulgakova boahtá muitalit nanai-gielas. Govva šamána nissonis lea váldojuvvon jagis 1993, go Bulgagova ja Juha Pentikäinen leigga oktasaš dutkanmátkkis. Govva: Priváhtta govva

Wikipedia dieđuid mielde nanai-giela hállet šat badjelaš 5 000 olbmo. Giella lea áitojuvvon ja dan geavahit eanaš badjel 50-jahkkásaš olbmot. Nuorat nanai-álbmoga olbmot hállet ruoššagiela.

Bulgagova, guhte hállá semináras, bargá Herzena universitehta Davvi álbmogiid instituhtas. Instituhta lea guhkká ovttasbargan Sámi oahpahusguovddážiin.

Dán vahkus Bulgagova dutká maiddái Sámi arkiivvas materiálaid, mat čatnasit nanai-álbmogii. Bulgagova galledeami leaba ordnen Sámi oahpahusguovddáš ja Sámi arkiiva.

Fállun stohpokonsearta, gosa besset dušše jođáneamos bileahttaoastit

Siida sámemuseas dáhpáhuvvá olu earáge dán jagáš Ijahis idja -festiválas. Seminára lassin Sámemusea Siida lea háliidan buktit maiddái iežas fálaldaga Ijahis idja -festiválii, namalassii Wimme Agálaš johttin -konseartta.

Olgomusea stohpokonsearta lea fállun dušše smávva jovkui.

– Dohko stohpui eai čága nu olu olbmot. Jáhkán, ahte dohko čáhket dušše sullii 40 olbmo. Jus dan konseartta háliida vásihit, ferte áiggil doapmat oastit bileahtta. Dohko vuvdet bileahtaid namalassii Sámemusea Siiddas, rávve Guttorm.

– Sihkkarit sidjiide, geat dohko besset, konsearta diekkár birrasis lea earenomáš vásáhus, lohpida Guttorm.

Dáppe oainnát olles festivála prográmma.

Varrasamosat: Sápmi

Váldoođđasat

Varrasamosat

Muualla Yle.fi:ssä