Sápmi |

Ijahis ija buvttadeaddji vuosttaš festiválatipsa: Mánáidbeaivvi konserttas Wimme ja čottalávlu Aydar Churupov

Ijahis ija buvttadeaddji Oula Guttorm muitala dán vahkus juohke iđit Buorre Iđit Sápmi -sáddagis festiválatipsaidis.

Wimme Saari
Govva: Inger-Elle Suoninen / Yle

Ijahis idja -festiválavahku vuosttas tipsa guoská mánáid- ja nuoraidbeaivvi fálaldaga. Oula Guttorm, festivála buvttadeaddji muitala mánáid- ja nuoraidbeaivvi šaddan vuogas oassin olles festivála, muhto beaivvis lea stuorra mearkkašupmi maid skuvlalaččaide.

– Skuvlalaččaide dat leat šaddan somás vuohkin álggahit skuvlajagi, dadjá Guttorm.

Mánáid- ja nuoraidbeaivvi dáhpáhusat ordnejuvvojit bearjadaga 16.8. dii. 10.00 rájes Sámi kulturguovddáš Sajosis ja dan šiljus.

– Bargobájiin leat fállun sámemusihkka: árbevirolaš musihka bargobájiid lassin maiddái modeardnamusihka bargobájit, main mánát ja nuorat besset oahpásmuvvat sihke musihka árbevirrui ja ieš musihka ráhkadeapmái.

Eanaš bargobájiide almmuheapmi leamaš juo giđđat, muhto mánáid- ja nuoraidbeaivve ordnejit maid muhtin bargobájiid, maidda beassá lávket sisa almmutkeahttá. Guttorm namuha, ahte nuoraidráđi ordnen nu gohčoduvvon pinssibargobádjái ja sámegielat lávdespealuid beassá speallat vaikko ii livččege almmuhan iežas bargobájiide ovddalgihtii. Maiddái dánsunbargobádjái sáhttá searvat almmutkeahttá.

– Sajosa šiljus Ánna-Katri Helander doallá dánsunbargobáji, mii lea rabas buohkaide.

Ánna-Katri Helander
Ánná-Katri Helander dánsabargobádji lea bearjadaga. Govva: Vesa Toppari / Yle Sápmi

Nuoraid konserttas mielde Wimme Saari ja čottalávlu Aydar Churupov

Ijahis idja -festiválavahkuloahpa konseartafálaldaga álggaha nuoraide ja mánáide ordnejuvvon skuvlakonsearta. Dat ordnejuvvo bearjadaga beaivet diibmu 13.00 ja konsearttas mánát ja nuorat besset ieža ovdanbuktit musihkaset.

Oula Guttorm máinnaša ovdamearkan nuorra násttiin ohcejohkalaš Mihku Laiti, guhte liiko dahkat mašiidnamusihka. Árabuš beaivet Mihku Laiti leage doallamin skuvlalaččaide iežas miela miel suorggi bargobáji.

Nuorra artisttaid lassin konsearttas leat loaiddasteamen riikkaidgaskasaččat dovddus juoigi Wimme Saari, guhte lea juo máŋgalogi jagi johtán festiválain juoigamin. Dasa lassin mánáid- ja nuoraidkonsearttas lea mielde eamiálbmot musihkkaguossi Ruošša bealde.

– Min álgoálbmotguossi Aidar Churupov ovdanbuktá čottalávluma, čilge Guttorm.

Aydar Churupov lea Sámi oahpahusguovddáža ja Ijahis idja -festivála oktasaš guossi, guhte lea mátkkoštan Anárii Ruossaš, Altai dásseválddis ja son ovddasta telengit-álbmoga. Churupov lea musihkkár ja šuokŋadahkki, guhte máhttá maiddái árbevirolaš kai-čottalávluma. Dasa lassin Churupov lea Altai álbmotčuojanasaid meašttir, muitala Marina Falevitch Sámi oahpahusguovddážis.

Aidar Churupov
Aidar Churupov lea oassálastán dološ musihka ja 500-400 oKr áigodagas leahkki skyhtaid hárppa ođđasishuksen -prošektii. Govva: Aidar Churupov - priváhtagovva

Ijahis idja -festivála čuozáhatjoavkun leat mánát ja nuorat muhto mánáid ja nuoraid beaivi lea rabas buohkaide, ja dohko lea nuvttá sisabeassan, loahpaha Oula Guttorm.

Geahča dáppe Ijahis idja -festivála prográmma.

Yle Sápmi lea okta Ijahis idja -festivála lágideaddjiin.

Varrasamosat: Sápmi

Váldoođđasat

Varrasamosat

Muualla Yle.fi:ssä