Sápmi |

Ijahis ija valáštallangilvvuide dán rádjái dušše okta almmuheapmi – Suohpansprint ja njoarosteamit vurdet vel oassálastiid

Dán jagáš Ijahis idja -festiválain olbmot besset gilvalit njoarosteamis. Valáštallangilvvut lágiduvvojit sihke bearjadaga ja lávvardaga Sajosa šilljui huksejuvvon njoarostanšilljus.

Aslak Paltto vuordá olbmuid searvvat Ijahis ija valáštallangilvvuide.
Valáštallangilvvuid lágideaddji Anára sámesearvvi ságadoalli Aslak Paltto. Govva: Vesa Toppari / Yle

Dán jagáš Ijahis idja -festiválain olbmot besset gilvalit njoarosteamis. Valáštallangilvvut lágiduvvojit sihke bearjadaga ja lávvardaga Sajosa šilljui huksejuvvon njuarostanšilljus.

Valáštallangilvvuid lágideaddji Anára sámesearvvi ságadoalli Aslak Paltto muitala, ahte valáštallangilvvuin leat guokte šlája, suohpansprint ja njoarosteapmi.

– Bearjadaga lea oanehis sprint- nappo viehkannjoarosteapmi, mii lea nugo báhčinčuoigamiin. Ja lávvardaga vel vehá oanehut gilvu njoarosteamis, dadjá Aslak Paltto.

Unnán almmuheamit dán rádjái

Aslak Paltto muitala, ahte dán rádjái leat boahtán dušše okta almmuheapmi, muhto beroštupmi gilvvuide orošii leamen.

– Muhtimat leat ringen munnje, ahte beroštumi daidda gilvvuide gal leat. Mis leat maiddái doppe buorit vuoittut, muhto eat leat vel almmuhan daid. Gal mii almmuhit duorastaga beaivvi mielde, makkár vuoittut mis leat, muitala Paltto.

Ijahis ija valáštallangilvvuide sáhttá almmuhit iežas maiddái báikki alde, dadjá Paltto.

– Sámiid málle lea dakkár, ahte sápmelaččat oassálastet diimmu ovdal gilvvu ja valáštallangilvui sáhttá almmuhit iežas vel báikki alde, boagusta Paltto.

– Buohkat sáhttet oasssálastit suohpangilvvuide. Mis leat iešguđet luohkát: mánáide, nuoraide, nissoniidda ja almmáiolbmuide sierra. Ja dát, geat servet festiválii, besset dieđusge oassálastit nuvttá gilvvuide. Gilvvuide ii leat sierra oassálastinmáksu ja njoarostanbáiki maiddái lea festiválašilljus.

Sámiid valáštallangilvvuide livčče eanetge dárbu

Anára sámesearvvi ságadoalli Aslak Paltto lohká, ahte sámiin eai leat nu olu dán sullásaš gilvvut.

Jos olbmuin leat eanetge beroštupmi, de valáštallangilvvut lágiduvvojit maiddái boahttevuođasge.

– Oainnán, ahte dákkárii lea dárbu ja galggašii eambo dákkáriid ordnet. Olbmot liikojit gilvalit ja dálhan leat Olympiagilvvut jođus ja jáhkán, ahte olbmuid mielas lea somá maiddái iešge valáštallat. Nu unnanhan leat mis sámiid valáštallangilvvut, nu jos lea olu beroštupmi, nu gal plánet vel boahttevuhtii juoidá, muitala Aslak Paltto.

Almmuheapmi gilvvuide giddejuvvo diibmobeale ovdal gilvvu álggu

Gilvvuide sáhttá almmuhit ovddalgihtii dahje báikki alde. Oassálastit sáhttá festiválagiehtabátti hattiin nu, ahte sierra oassálastinmáksu ii leat.

Dehálaš lea almmuhit iežas gilvvuide ovddalgihtii dahje maŋimuštá bileahtavuovdimis festiválaguvlui boađedettiin. Almmuheapmi giddejuvvo diiimmu ovdal gilvvu álggu.

Lassedieđut ja almmuheamit valáštallangilvvuide Aslak Paltto, paltto(a)hotmail.com , +358 40 562 0354. Almmuheami sáhttá dahkat maid uvssas.

Varrasamosat: Sápmi

Váldoođđasat

Varrasamosat

Muualla Yle.fi:ssä