Sápmi |

Ijahis ija váldolávddis servodatságastallamat – Yle Sápmi -arena golmma sámegillii

Yle Sápmi -arena buktá servodatságastallama Ijahis ija váldolávdái. Fáddán leat Sohkaršohkka-tv ja dat mo Suoma sámit vedjet áiddo dál.

Niillas Holmberg
Niillas Holmberg muitala Yle Sápmi -arenas lávvardaga 20.8. mo meditašuvdna sáhttá veahkehit etnostreassas. Govva: Mira Rauhala / Yle

Yle Sápmi -arena lea okta eamiálbmogiid musihkkafestivála Ijahis ija ođđa fálaldagain. Dán nama vuolde ordnejuvvojit servodatságastallamat áigeguovdilis fáttáin golmma sámegillii.

Yle Sápmi -arena lea lávvardaga diibmu 15.00–16.30 ja dat sáddejuvvo interneahtas siiddus sogku.fi/live.

Meditašuvnnas veahkki etnostressii?

Vuosttas ságastallan diibmu 15.00 jearrá livččego meditašuvnnas veahkki etnostressii.

Dáiddar Niillas Holmberg muitalii álgogease Geasseguossi-radiosáddagis, ahte meditašuvdna lea sutnje okta vuohki báhtarit guovtti kultuvrra gaskkas dáistaleami, assimilašuvnna ja etnostreassas duoldama.

Suohpanterror lea hábmen Ijahis ija 2016 plakáhta.
Govva: Ijahis idja
Ságastallamis Niillas Holmberg, Tiina Sanila-Aikio ja Pirita Näkkäläjärvi suokkardit dáiddara, Suoma sámiid njunnoža ja mediahoavdda perspektiivvas mo Suoma sámit vedjet áiddo dál.

Sohkaršohkka-tv: tv:i vai internehttii?

Nubbi ságastallan álgá diibmu 15.45 ja dan fáddán lea Sohkaršohkka-tv.

Sámi leanadáiddar Anne Kirste Aikio muitala sámegiel nuoraid tv-prográmmafidnus, mainna son lea bargamin ovttas Yle Sámi doaimmaheaddjiin ja sámenuoraiguin.

Sohkaršohkka-tv: Aslak Paltto ja Sara Wesslin
Govva: Ville Fofonoff / Yle
Ságastallamis Anne Kirste Aikio sihke doaimmaheaddjit Heli Huovinen, Sara Wesslin ja Laura Pieski smiehtadit, ahte galggašedjego Suoma tv:s leat sámegiel nuoraidprográmmat vai galggašiigo daid buvttadit njuolga internehttii. Álbmot beassá maid oaidnit osiid Sohkaršohkka-tv-pilohtas.

Golmma sámegillii

Guktot ságastallamat leat sámegillii ja álbmot sáhttá boahtit čuovvut daid báikki ala Ijahis ija váldolávdái Sajosa šilljui.

Sisabeassan lea festiválagiehtabáttiin.

Ijahis idja lágiduvvo Anáris 19.–21.8.2016.

Varrasamosat: Sápmi

Váldoođđasat

Varrasamosat

Muualla Yle.fi:ssä