Sápmi |

Ima áigu heaitit bargamis filmmaiguin

Dáiddar Inger-Mari Aikio, Ima, áigu heaitit bargamis filmmaiguin. Son lea dolkan dasa man váttis Suomas lea ruhtadit sámi filmmaid.

Video: Ima

Suoma Sámis eai leat beare galle filbmadahkki ja dál dat okta maŋimuččain áigu heaitit go son lea dolkan.

Inger-Mari Aikio ođđasamos dokumeantafilbma Amoc – Vuosmuš anárašráppejeaddjis Amocis, Mikkal-Antti Morottajas, geasuhii sáledievva olbmuid Skábmagovain mannan lávvardaga Anáris.

Inger-Mari Aikio, Skábmagovat 2016
Govva: Skábmagovat

Filmma bágadalli burssas dat ii goit dovdo. Danin áigu Ima heaitit filbmabargguid.

– Na jos giidnu buktá munnje čuohte duhát euro, daga dainna dokumeantta, nu gal mun dalle dagan, Aikio dadjá.

Muhto ieš it áiggo šat ohcat?

– Áš, mun gille šat daddjut.

Yle ii oasttán Amoc-dokumeantta

Birget sámi filmmaiguin, dat lea váttis Suomas, lea Ima vásihan.

Amoc -Vuosmuš
Govva: Inger-Mari Aikio
Soames filmmat leat beassan gitta tv:ei, ja dain lea ožžon dan lahkai bálkká, muhto mo deges juos filbma ii dohkkege.

– Dat ruhtaohcan lea dakkár ášši, ahte mun in veaje oppa hállatge dan birra. Dat lea nu veadjemeahttun dán áigge. Dál lean vahkku áigi ožžon dieđu, ahte Yle ii oastte Amoc-filmma. Dat dárkkuha dan, ahte mu áidna dienas logi jagi barggus lea 500 euro, maid lean ožžon das go Riddu Riđđu čájehii dan manna gease, Aikio muitala.

"Oktage ii eale oanehisfilmmaid dahkamiin"

Skábmagovat čogge dánge jagi Anárii badjel 3 000 geahčči ja bivnnuhamos filmmat ledje namalassii Inger-Mari Aikio ja Suvi West sámi dokumeanttat.

Sámi filmmaid ja erenoamažit oanehisfilmmaid dahkkiin orru Suoma bealde goittotge leamen heajos boahttevuohta. Dán váttisvuođa dovdet filbmadahkiid gaskavuođas.

Juhani Alanen
Juhani Alanen Govva: Kirsti Helena Länsman / Yle
Juhani Alanen lea Tampere filbmafestivála doaimmajođiheaddji, muhto dovdá maid sámi filbmamáilmmi bures.

– Das ferte vuolgit, ahte oktage ii riekta oastte oanehisfilmmaid. Yle gal čájeha daid, muhto oanehisfilmmaid dahkamiin ii gal duođaid eale. Dahje hárve eallá, Alanen dadjá.

Dál áigu Ima čálligoahtit

Go filmmat báhcet, áigu Ima dál čálligoahtit. Leahan son maid girječálli ja barggu vuolde lea nuoraidromána.

– Mun lean jo ovdal dadjan, ahte mun áiggon heaitit filmmaid dahkamis ja dál go fidnejin dan Amoc gárvvisin de mus ii leat šat mihkkege gaskan. Ja lean fidnen buot musihkkavideoid gárvvisin, ii leat datge gaskan, de mus lea hui buorre vejolašvuohta dál heaitit dáin daddjumis.

Ima
Ima Govva: Anja Kaarret / Yle
Mii dan čállimis de lea nu hirbmat buorre?

– Dat lea nu olu mu iežan duohken. Filbmadahkan lea eanet dakkár joavkobargu ja lea hui olu earáid duohken. Gárttan earáide máksit ja dasa dárbbaša ruđa. Čállimii ii dárbbaš eará ruđa go iežan biebmat, Aikio dadjá.

Varrasamosat: Sápmi

Váldoođđasat

Varrasamosat

Muualla Yle.fi:ssä