Sápmi |

Ima čállán ođđa diktagirjji – Vuosttas sámegillii čállojuvvon erohtalaš divttat

Inger-Mari Aikio ođđa diktagirji ii leat dárkkuhuvvon mánáide. Aikio háliida girjjiin cuvket jaskatvuođa seksuálavuođas.

Ima čálligođii daid divttaid beannot jagi áigi.

Girječálli, diktačálli, musihkkačálli, filbmačálli ja -bagadalli Inger-Mari Aikio, nappo Ima, lea čállán ođđa diktagirjji. Dat lea sámi girjjálašvuođa vuosttas sámegillii čállojuvvon erohtalaš diktagirji. Girji galggašii almmustuvvat loahppajagis.

Ima čálligođii divttaid beannot jagi dassái.

– Mun ledjen Meksikos, álgoálbmogiid diktafestiválas ja hálešteimme Niillas Holmbergiin. Son muitalii son láve temáid mielde čállit dán áigge divttaid. De mun jurddašin mun maid háliidan čállit temá mielde, ja válljejin temán erohtalaš divttaid.

Aikio lea maiddái čállán mánáide girjjiid ja lávlagiid, ja su maŋimuš girji "Tropihka rievssat" lei oaivvilduvvon nuoraide. Dál lei áigi fas čállit rávesolbmuide.

– Jáhkán gal, ahte oalle nuorat sáhttet dan lohkat, ii das leat gal áibba snuollan vaikke oalle njuolga čálán gal. Lean iskan seailluhit dákkár čábbodaga, čilge Ima.

Inspirašuvnna divttaide lea Ima ožžon iežas vásáhusain, muhto maiddái interneahtas.

– Oasi fáttáiguin ja jurdagiiguin lean áibba neahtas viežžan, lohkan maid olbmot čállet ja de lean heivehan daid iežan oaivái.

Háliida boktit ságastallama seksuálavuođas Sámis

Vaikko seksuálavuohta lea lunddolaš oassi olbmo eallimis, de dan birra eai leat hirbmat rahpasit hállan sámeservodagas. Inger-Mari Aikio jáhkkáge, ahte dat girji boktá ságastallama.

– Jáhkán dan maŋŋá go dat almmustuvvá, de dat, geat lohket nu jáhkán das šaddá oalle ságastallan. Dien gal lean áigá vuohttán, ahte dat lea tabu ainge.

– Doaivvu miel daid divttaid mielde sáhttá háleštit rahpasabbot daid áššiid birra, ja oaidnit, ahte dat ii leat álo fiinna romantihkalaš ášši, mo dat oidnojit filmmaiguin, muitala Ima.

Leago Imai álki hállat rahpasit seksuálavuođas? Makkár áššit dan diktagirjjis eai leat? Guldal Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä