Sápmi

"In sáhte oaidnit áhku inge leat duostan dahkat makkárge earenomáš plánaid dán geassái" – spiehkastatdilli váikkuha nuoraid geasseplánaide

Korona vaikuttaa paljon nuorten kesäsuunnitelmiin.
Avvila logahaga oahppit Ruska Tanhua, Emma Kankaanpää ja Tuuli Nissilä leat gártan rievdadit iežaset geasseplánaid koronavirusdili dihtii. Govva: Sara Wesslin / Yle

Koronagiđđa leamašan avvillaš nuoraid mielas earenomáš lossat. Dál skuvllat nohket ja ovddas lea jaskes geassi.

Losses skuvlagiđa maŋŋá guhká vurdon geasseluopmu álgá viimmát. Nuoraid geasseplánat leat goittotge rievdan olu koronavirusa dihtii.

Avvillaš nuorat Emma Kankaanpää, Tuuli Nissilä ja Ruska Tanhua leat galgan smiehttat dán geasi ollásit ođđasit.

– In sáhte oaidni áhku inge leat duostan dahkat makkárge earenomáš plánaid dán geassái, jos ii vaikko beasage vuolgit gosanu. Livččen háliidan mannat beaiveruktui geassebargui, muhto dohko ii sáhtán mannat, muitala Emma Kankaanpää.

Tuuli Nissilä fas lei plánen fitnat festiválain ja mátkkoštit Suomas ja olgoriikkain, muhto dál dat ii leat vejolaš.

– Gal dat lea buorre, ahte festiválat eai ordnejuvvo vai eai leat olu riskkat, muitala Tuuli Nissilä.

Nuorat muitalit, ahte dát giđđa lei earenomáš lossat. Korona dihtii logahaga vuosttas luohkálaččat galge stuđeret ruovttus gáiddusoahpahusas ávdnasiid, maidda livččii dárbbašan eanet veahki oahpaheaddjis.

Ihttin lávvardaga álgáge luopmu, man leat juo guhká vuorddašan.

"Livččii somá oaidnit skihpáriid, geat ásset eará guovlluin Suomas"

Dál Suomas guorahallet rahpat fas mátkkošteami Suoma rájáid siskkobealde. Dálá dilis Suoma ráđđehus goittotge ain ávžžuha garvit mátkkošteami maiddái ruovttueatnamis.

– Diena lea váivi, go livččii somá oaidnit skihpáriid, geat ásset eará guovlluin Suomas. Dál sin ii leat gánnihahtti oaidnit, dadjá Ruska Tanhua.

Jos reaissut eai ollašuva, de ferte ieš hutkat áigeájanasaid. Tanhua áigu geassebargguid lassin ráhkkanit boahttevaš jiekŋaskearrobádjái viššalit.

– Mun áiggun trenet eanet go dábálaččat dán gease, go lea nu olu eanet áigi. Dál lean juo fitnan rullaluistemin ja áiggun čiekčat spábba.

Varrasamosat

Muualla Yle.fi:ssä