Sápmi |

Influensaboahkuheamit maŋŋonit – Sámi gielddat boahkuhišgohtet easkka juovlamánus

Boahkuhanáiggit almmuhuvvojit maŋŋelis, muitalit gielddaid dearvvasvuođafuolahusain.

Vaxigrip Tetra influenssarokote.
Vaxigrip Tetra influenssaboahkuhanávnnas. Govva: Mårten Lampén / Yle

Boahkuheamit maŋŋonit, go influeansadávdda várás ráhkaduvvon boahkuhanávnnas válbmanii maŋŋelis go ovddit čavččaid.

Máilmmi dearvvasvuođasearvi WHO dárbbašii dán jagi ovtta mánu eanet lasseáiggi dutkat, ahte makkár influensavirusat čuovvovaš mánuid áigge dagahit eanemus buohcuvuođaid.

Suopma lea diŋgon influensaboahkuhanávdnasa 1,8 miljovnna stuhka. Ollesolbmuide boahkuhanávnnas biddjojuvvo čuggemiin, muhto uhca mánáide boahkuhanávdnasa sáhttet addit maiddái njunnecirgganassan.

Sámi gielddain boahkuhišgohtet skábmamánu loahpas ja juovlamánus

Eanaš Sámi gielddain, Anáris, Eanodagas ja Ohcejogas, influensaboahkuheamit álget easkka juovlamánus. Soađegilis influensaboahkuheamit álget skábmamánu 18. beaivve.

Ohcejoga dearvvasvuođafuolahusas muitalit, ahte dárkilis boahkuhanáigedávval ii leat vel dieđus ja boahkuheamit álget easkka iehčanasvuođabeaivve maŋŋá. Maiddái Eanodagas boahkuheamit álget easkka juovlamánus.

Anára gieldda dearvvasvuođa fuolahusas dieđihit, ahte sii bastet álggahit influensaboahkuhemiid juovlamánus.

– Influensa boahkuheamiid áiggit almmuhuvvojit maŋŋelis, dieđiha Anára gieldda .

Dearvvasvuođa- ja buresveadjinlágádus THL lea ávžžuhan gielddaid álggahit boahkuhemiid skábmamánu beallemuttu maŋŋá ovdal go influensaepidemiija álgá. Influensaepidemiija álgá Suomas dábálaččat ođđajagi doajáldaga maŋŋá.

THL earenoamášáššedovdi Niina Ikonen dadjá, ahte vaikko boahkuheapmi maŋŋona, de liikká álbmot galggašii geargat oažžut suoji boahtte dálvvi influenssa várás.

– Epidemiija álgá dábálaččat easkka jagi molsuma maŋŋá, ođđajagimánu álggus. Dábálaččat vearrámus dilli lea guovva-njukčamánus. Dál mis ii leat vel goit diehtu, ahte dávda álggášii váivvidit árabuš go dábálaččat, Ikonen namuha.

9.10.2019 dii. 8:21. Ođas čielggasmahttojuvvon Soađegili bokte. Soađegilis influensaboahkuheamit álget skábmamánu 18. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä