Sápmi |

Ingá-Máret Gaup-Juuso almmustahtá vuosttas cd-skearrus Mingá-namain

Sámi Grand Prix -juoiganoasis nubbin boahtán Ingá-Máret Gaup-Juuso lea bargamin vuosttaš cd-skearruinis. Skearru almmustuvvá Mingá-namain ja dan dan buvttada Tuupa Records.

Iŋgá-Máret Gaup-Juuso (gur.)
Ingá-Máret Gaup-Juuso Sámi Grand Prix -finála bottus. Govas maid Ellen Marit Oskal ja Petra Biret Magga-Vars. Govva: Liv Inger Somby / NRK Sápmi

Sámi Grand Prix -juoiganoasis nubbin boahtán Ingá-Máret Gaup-Juuso lea bargamin vuosttaš cd-skearruinis.

Son almmustahttá cd-skearru Mingá -namain. Mingá-jovkui gullet Gaup-Juuso lassin musihkkarat, geat leat guhká bargan sámemusihkain.

Skearru almmustuvvá geassit 2015 ja Mingá vuosttaš konsearttat leat maid geassit.

Tuupa Records illuda ođđa artisttas

Cd-skearru almmustahttá Tuupa Records Oy, Suoma áidna skearrolágádus, mii jeavddalaččat almmustahttá sámemusihka.

Tuupa Records -skearrofitnodaga vuođđudeaddji Jussi Isokoskii geigejuvvui beassášlávvardaga Áillohaš-bálkkašupmi Sámi Grand Prix -finála oktavuođas.

Isokoski dadjá, ahte son lea ilus boahttevaš cd-skearrus ja lea movttet ođđa artisttas.

– Olles lágádus sávvá Ingá-Máreha buresboahtin Tuupa bearrašii, mii jámma stuorru. Mii vuordit iluin ovttasbarggu ja sávvat dat bistá guhká. Mingá lea erenomáš lassi min dálá artistakatalogii, Isokoski dadjá.  

Skearrus pop-musihkka ja árbevirolaš luohti

Mingá-joavkku sd-skearru buvttada Roope Mäenpää. Son lea dovddus earret eará guhkes ovttasbarggustis Niillas Holmbergiin.

Mäenpää vástida maiddái eanáš skearru šuoŋain ja heiveheamis. Son dadjá, ahte skearru musihkka ovttastahttá dálá pop-musihka ja luođi roavvan ja eaktin. 

– Mu mielas lea dehálaš, ahte luođi aitosaš fápmu ii biliduvvo, nu ahte dat šaddá reformerejuvvot dálá áigái. Luohti dušše sirdojuvvo birrasii, mii lea ráinnas ja goittot gitta dán áiggis, Mäenpää gávnnaha.  

Mäenpää mielde sii figget dahkat musihka, man stiila ii guora ovdagovaidasaset, muhto baicca hivveha hukset iežas bálgá.

Cd-skearrus bohtet leat sihke árbevirolaš ja modearna luođit. 

– Lean leamašan aktiiva juoigi jo mánnávuođa rájes. Skearrustan háliidan buktit ovdan nana juoigama, mii duođaid vuolgá dovdduin. Mu skearrus bohtet leat ođđa luođit muhto maiddái boares, árbevirolaš luođit, Ingá-Máret Gaup-Juuso muitala.

Varrasamosat: Sápmi

Váldoođđasat

Varrasamosat

Muualla Yle.fi:ssä