Sápmi |

Inkermarja Hetta ja Antti-Oula Juuso bálkkašuvvuiga barggusteaskka sámegiela, kultuvrra ja árbevirolaš ealáhusaid ovdii

Guktot oaččuiga 3 000 euro sturrosaš bálkkašumi.

Inkermarja Hetta ja Antti-Oula Juuso
Inkermarja Hetta ja Antti-Oula Juuso leigga boahtán Heahttái Johtti sápmelaččat -searvvi ávvuseminárii, gos bálkkašumit geigejuvvojedje. Govva: Linnea Rasmus / Yle
Heahttá

Sámedikki kulturlávdegoddi lea juohkán odne Heahtá Márjjabeivviin kulturbálkkašumiid.

Eallinbargu-kulturbálkkašumi oaččuiga dán háve Inkermarja Hetta Vuohčus ja Antti-Oula Juuso Eanodagas. Bálkkašupmi addui sudnuide barggus sámegiela, kultuvrra ja árbevirolaš ealáhusaid ovdii.

Antti-Oula Juuso váldobargun leamašan boazodoallu, muhto son lea bargan maiddái dáiddárin. Son gohčodage iežas dáidaga dahkki boazoalmmájin.

Juuso lea leamaš aktiivvalaš maiddái sámegiela ovddideames. Son lei earret eará gáibideamen Gárasavvonii sámegielat oahpahusa ja lea doallan sámegiela kurssaid.

– Gal dat suohtas gal lea go váldet fuomášumi ná olbmo bargguin, illuda Juuso.

Tuomas Aslak Juuso ja Riitta Orti-Berg jakoivat elämäntyöpalkinnot Inkermarja Hetalle ja Antti Oula Juusolle
Sámedikki nubbi várreságadoalli Tuomas-Aslak Juuso ja kulturčálli Riitta Orti-Berg geigiiga eallinbargu-bálkkašumiid Inkermarja Hettai ja Antti-Oula Juusoi. Govva: Kirsti Länsman / Yle

Inkermarja Hetta lea eallinagis áigge earret eará oahpahan sámegiela, ovddidan duodjeárbevieru ja vurken govaid Soađegili dulvaduvvon orohagain. Son leamašan aktiivvalaččat mielde searvedoaimmain, bargan rájáid rastá ja muđuige leamaš aktiivva olmmoš sámeservoša ovddideames.

Maiddái son lei buriin mielain, go gulai sutnje mieđihuvvon dovddastusas.

– Gal dat ledje dakkár jurdagat, ahte dat leat atnán árvvus dan barggu maid mun lean bargan. Munhan lean leamaš juohke guovllus bargamin mánnávuođa rájes dán rádjai, muitala Hetta.

Hárvenaš bálkkašupmi

Eallinbargu-bálkkašupmi ii juhkkojuvvo juohke jagi. Ovddit bálkkašumi lea ožžon vuohččulaš Juhan Erkki "Reutu" Hetta jagi 2012.

Dát lea vuosttas háve dán Sámedikki válgabaji áigge, go kulturlávdegoddi juogadii eallinbargu-kulturbálkkašumiid, muitala Sámedikki kulturčálli Riitta Orti-Berg.

– Kulturlávdegotti lahtut jurddašedje, ahte sii háliidit addit bálkkašumi olbmuide, geat leat ollu eallináigge bargan ja ovddidan sámi kulturárbbi, giela ja árbevirolaš ealáhusa, ja bargan hui ollu eaktodáhtolaš barggu.

Inkermarja Hetta ja Antti-Oula Juuso válddiiga bálkkašumiid vuostá eahketbeaivve Heahtás Johtti Sápmelaččat -searvvi 50 jagi ávvusemináras Duottar-Lappi luondduguovddážis. Guktot oaččuiga 3 000 euro sturrosaš bálkkašumi.

Varrasamosat: Sápmi

Váldoođđasat

Varrasamosat

Muualla Yle.fi:ssä